Tuir Diretór Eskola Sekundária Jerál Suai, Francelino Freitas Carvalho katak, mezmu aplika Serka Sanitária la'o ona loron balun, maibé parte eskola nian seidauk simu karta sirkulár husi Edukasaun Munisipiu Covalima hodi orienta ba estudante sira para feriadu temporáriu hodi kontribui no proteze an husi Covid19.

"Ami seidauk simu imformasaun hosi EMC para halo suspensaun ba prosesu aprendizajem, só ami akompaña husi média mak eskola baln iha Covalima ohin feriadu ona," Imforma Diretór Francelino ba www.tempotimor.com iha nia kna'ar fatin, Sesta (19/2).

Nia afirma, bainhira desizaun EMC iha para halo suspensaun ba atividade eskolár hodi hodi orienta profesór no estudante sira kumpri regras estadu emerjénsia ne'e di'ak tebes. Tanba bele salva profesór no estudante sira husi pandemia Covid-19.

"Ohin ami hein hela karta ruma husi edukasaun munisipiu para kumpri regras estadu emerjénsia iha eskola refere, maibé seidauk iha," katak Nia.

Entretantu dadaun Profesór sira ne'ebé hanorin iha eskola refere iha permanente na'in 43, kontartadu na'in 24 no voluntáriu na'in 27. Alende ne'e estudante ne'ebé hala'o estudu iha eskola refere hamutuk rihun 2.175 ne'ebé kompostu husi mane 1.215 no feto 960.(*)