Tuir Afonso, aplika serku sanitária iha munisípiu Covalima no Bobonaro, signifika komunidade husi munisípiu seluk labele mai Covalima inklui husi munisípiu Covalima mós labele viajem ba Munisípiu seluk, tanba atu prevene no deteta moras Covid-19 kona-ba transmisaun lokál.
"Serku sanitária ne’e komesa válidu husi horseik (15/2) to'o (3/3), ne'ebé ita servisu hamutuk ho komandante Polísia Nasionál Timor-Leste (PNTL) munisípiu Covalima nian, ohin ita tau ona postu seguransa iha área Webaba dalan ba Bonuk tau mós iha suku Lepo postu Zumalai baliza ho munisípiu Bobonaro, inklui kontrola mós dalan ba Lolotoe, Maucatar no Fatululik ne’ebé nafatin baliza ho Bobonaro, nune'e ita bele deteta moras Covid-19 ne'e," Dehan Nia.
Liga ba situasaun ne’e, Administradór husu ba komunidade sira iha Covalima hakmatek no kumpri de’it regras sira ne'e, atu nune'e bele prevene transmisaun lokál iha Munisípiu Covalima.
"Serku sanitáriu ne’e mós dehan ita labele sai no husi munisípiu seluk mós labele mai Covalima, tanba ne'e mak ita-nia segurança PNTL sira harii postu seguransa iha fronteira ba munisípiu seluk hanesan Bobonaro no Ainaro, tanba ne'e ha’u husu ita hotu hakmatek iha fatin hodi hein orientasaun husi nível nasionál to’e loron 3 Marsu 2021," Nia esplika.
Entertantu Administradór ne’e mós nafatin alerta ba komunidade sira iha fronteira liu-liu suku ualu no aldeia 18 iha liña fronteira, atu labele ultrapasa ba Indonézia no munisípiu Bobonaro, maibé hakmatek iha fatin hodi prevene Covid-19.
Nia mós afirma, informasaun sira refere, kontinua partilla ba administadór postu hitu nian inklui to’o iha autoriedade lokál sira kona-ba aplikasaun sekru sanitáriu iha Covalima no Bobonaro.(*)
