Tuir Diretór Servisu Saúde Munisípiu Covalima Filipe Pereira Lemos katak, sidadaun mane ida ne'e hela iha karantina semana ida resin ona mak ekipa vizilánsia foin detekta katak, sidadaun ne'e pozitivu ba covid-19.

"Ohin ha'u simu ona informasaun husi parte vizilánsia sira iha karantina katak, rezultadu teste iha ona, maibé ita sei konfirma ho rezultadu teste husi laboratóriu nasionál, mais kuandu laboratóriu parte rua ne'e mak hanesan, entaun ema ne'e pozitivu ona Covid-19," dehan Filipe iha nia knaar fatin, Kinta (4/2).

Diretór ne'e afirma, sidadaun refere ninia sampel lori ona ba laboratóriu nasionál hodi halo konfirmasaun. Inklui pasiente refere tama iha teritóriu nasionál iha loron 22 Janeiru 2021 husi fronteira postu integradu Salele, ne'ebé kontinua iha karantina Suai Vila.

Sidadaun ne'e mane ida ho naran inisial NA ne'ebe ho data moris 8/8/1992.

Parte saúde munisípiu Covalima mós husu ona ba komunidade sira atu kumpri nafatin orientasaun ka regras husi OMS.

"Ami husu ona ba komunidade Covalima katak, nafatin kumpri regras husi Organizasaun Mundiál ba Saúde (OMS) hanesan uza máskara, distansiamentu sosiál, fase liman bei-beik, liu-liu ba sira ne'ebe servisu iha fronteira tenke atensaun másimu ba sidadaun Indonésia ne'ebé atu tama mai," katak Nia.

Entertantu observasaun www.tempotimor.com iha terenu nota katak totál ema ne'ebé iha karantina Suai Vila hamutuk 16 ne'ebé kompostu husi mane na'in 12 no feto na'in haat. Depois husi kazu refere halo funsionáriu sira iha Alfandega no membru Unidade Polísia Fronteira (UPF) sira pániku, tanba iha karantina refere iha ona kazu pozitivu Covid-19.(*)