Iha akontesimentu ne'e, rezulta vítima na'in 4 hetan kanek, no suspeitu nain 4 mak PNTL munisípiu Kovalima konsege kaptura no detein ona iha sela polísia, maibé sei hela suspeitu ida ho naran inisial AS mak polísia sei buka tuir tanba halai husi responsábilidade krime.
"Iha kazu insidente balun iha dia 02 Janeiru 2021, ema asalta malu iha Suai rezulta ema na'in 4 kanek, suspeitu na'in 5, 4 detein ona iha Sela PNTL munisípiu Suai, ida maka sei buka tuir hela", Portavóz Komandu Jerál PNTL, Superintendente Xefi, Arnaldo de Araújo hateten liuhusi konferénsia Imprénsa iha Kaikoli, Tersa (05/01).
Nia dehan, daudaun ne'e PNTL munisípiu Kovalima hala'o hela prosesu investigasaun hodi buka hatene motivu loloos husi kazu refere.
Arnaldo dehan, maski iha munisípiu balun mak akontese kazu asidente no, insidente balun, maibé jeralmente situasaun iha territóriu tomak la'o di'ak no hakmatek.(*)
