Print this page

Xefi Suku Matai Konsidera ‘Governu Xanana’ Fakar Osan ba Uma MDG Habokur de’it Empreza

By January 02, 2021 4389
Uma Mellenium Development Goas (MDG) hamutuk 100 ne'ebé konstrui iha Suku Matai nakonu ho duut iha laran tanba komunidade balun husik abandona no la hela, kinta (31/12). Uma Mellenium Development Goas (MDG) hamutuk 100 ne'ebé konstrui iha Suku Matai nakonu ho duut iha laran tanba komunidade balun husik abandona no la hela, kinta (31/12). Foto Tempo Timor

Tempotimor (Kovalima)— Xefi Suku Matai Joăo Gusmăo konsidera, governansaun anterior ne’ebé lidera hosi Kay Rala Xanana Gusmão fakar osan konstrui uma Millenium Development Goal (MDG) hamutuk 170 iha Suku Matai, Postu Administrativu Maucatar, Munisípiu Cova Lima habokur de’it kompañia Karya Timor-Leste no Jonize.

Xefe Suku Matai esplika, uma MDG 70 ne’e governu kontrata kompañia Karya Timor-Leste no Jonize maibé la halo uluk estudu, tanba realidade hatudu komunidade sira hela iha kondisaun uma ne'ebé la dignu, tanba laiha sintina no eletrisidade.

“Ha'u nu'udár autoridade lokál, estadu fakar osan, maibé nia kualidade mak laiha, ida-ne'e signifika osan ne'ebé mak boot, maibé ita habokur de'it kompañia ne'ebé mak halo, atu di'ak ba povu laiha", hatete Xefi Suku Matai ba jornalista sira iha Kovalima, Kinta (31/12).

Nia fó hanoin ba governu, loloos ne’e uma modelu MDG tenke dezeña iha pakote, katak halo uma tenke tau mós hariis-fatin, kanaliza bee-moos no instalasaun eletrisidade.

"Maibé ida ne'e, sira halo de'it uma, listrik mós ladún tau konsiderasaun, komunidade sira mak dada ba mai, ida-ne'e ladún di'ak, depois moos bee-mós tanba komunidade barak mak hela iha-ne'ebá, maibé sira nunka hanoin halo perfurasaun ba bee-moos. Ida-ne'e maka durante ne'e ami enfrenta hela susar ida-ne'e", nia kestiona.

Tuir nia, estadu fakar de'it osan ba hari'i uma ne’ebé di’ak tenke ho estudu viabilidade, laiha estudu ka planu ida kle’an, tanba realidade hatudu katak uma MDG hirak neebé konstrui, laiha liña eletrisidade, bee-mós, lixu-fatin no sintina tanba nesesidade bázika tenke kontempla hotu.

Nia sujere ba governu iha futuru atu hari'i uma ba kbi'it laek sira tenke planeia uluk planu ka estudu viabilidade hafoin halo konstrusaun.

“Kondisaun uma MDG ita haree komesa lahuk tiha ona, dala-ruma monu hela de'it, ha'u hanoIn ita haree ba kualidade, signifika katak osan boot, maibé kualidade ladún di'ak, ne'ebé ami autoridade haree tuir de'it, buat ne'ebé di'ak, ami dehan di'ak, buat ne'ebé aat, ami tenke ser esplika sai para atu nune'e estadu fó sasán ba povu tenke ser kontente", hatete Xefi Suku Matai.

Entretantu, suku Matai iha populasaun hamutuk 3675, aldeia 4 kompostu haosi Maior-kunain, Matai, Kiar no Lohorai, ne'ebé lokaliza iha Postu Administrativu Maucatar, Munisípiu Cova Lima.(*)

Rate this item
(0 votes)
Last modified on Saturday, 02 January 2021 22:17
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items