Administradór Postu Administrativu Tilomar, José Fátima Xavier klarifika katak durante distribuisaun cesta bázika iha aldeia 23, suku haat iha Tilomar, prosesu hotu la’o ho di’ak tanba laiha problema ruma mosu husi komunidade sira.
“Ami laiha problema tanba apoiu sira-ne'ebé maka mai, ami-nia komunidade sira mós la reklama. Sira durante ne'e hein hela cesta bázika bainhira mak to'o mai. Tanba ne'e mak ha'u la kestiona tanba razaun sidadaun sira-ne'ebé maka sai benefisiáriu direita ba iha cesta bázika, sira la halo reklamasaun", hatete Administradór Postu Administrativu Tilomar, José Fátima Xavier iha ba salaun administrasaun munisipál Kovalima, Kuarta (31/12).
Maske mosu fallansu balu ne'ebé dala-ruma komplikadu dadus maibé tenke agradese ba governu tanba durante estadu emerjénsia família balu husi Dili ba hela tán iha suku, halo sira konfuzaun oitoan.
“Ami laiha problema ida-ne'ebé mak garve no ami agradese mós kompañia Aitula ne’ebé halo distribuisaun cesta bázika ba ami-nia komunidade sira, iha problema ki'ik balu kompañia Aitula konsege rezolve ho kakutak malirin," dehan nia.
Entretantu, Administradór Postu Administrativu Fatukulik, Elias da Cruz hatutan, maiória komunidade iha suku Fatululik simu hotu cesta bázika, maske problema balu, maibé la grave no ekipa sira buka solusiona kedas.
Nia rekomenda ba governu, iha futuru atu hala'o programa ne'ebé hanesan, primeiru identifika uluk produtu lokál ne'ebé eziste iha suku no postu administrativu sira, tanba dala ruma produtu lokál hanesan batar ho koto iha hela, maibé kompañia sira sosa fali husi fatin seluk.
“Ita foti husi fatin seluk mai talvez umanu ou ema kriatura sira labele satisfaz ho distribuisaun sasán ne'ebé ke iha, maibé programa ida-ne'e governu nian, ema hotu-hotu koopera no komunidade mós simu ho fuan boot," dehan nia. (*)