Prezidente Autoridade Kovalima Afonso Nogera Nahak hatete, nia parte alerta ona ba autoridade suku atu ajuda UPF no Falintil-FDTL hodi asegura lina fronteira nune'e populasaun iha Suai nafatin livre husi Covid-19.

"Ita alerta ba iha ita-nia xefe suku sira atu ajuda tau-matan ba iha lina fronteira," dehan PA Kovalima ne’e ba www.tempotimor.com iha Tiliomar, Kinta (17/9).

Afonso hatutan, parte autoridade lokal kontinua halo koordenasaun ho parte seguransa no konsege kaptura membru PSHT ne'ebé sa’e sintu iha Atambua, Indonezia.

Maske nune’e, Afonso rekoñese, movimentu tama no sai ilegalmente sei iha nafatin tanba lina fronteira Suai nian mós luan.

"Mai iha ne'e, balun aprejenta an, balun polisia mak jemput (kaptura) lori mai tama hotu iha kuarentena," dehan Afonso.

Entertantu, tuir dadus, dadaun ne'e membru PSHT na’in 63 mak tama kuarentena iha Kovalima.

"Sira ne'e mai husi organizasaun artemarsiais hafoin ba sa’e sabuk fila mai mak kaer," dehan Afonso.