Aeroportu Internasional Suai Lori Dezastre Ba Komunidade Featured

Aeroportu Internasional Suai Lori Dezastre Ba Komunidade Foto Facebook "Loro Mau".

Tempotimor (Dili) - Prosesu dezenvolvimentu iha kosta-súl, liuliu iha Munisipiu Covalima la'ós atu lori prosperiedade ba povu, maibé fila sai dezastre.

Tanbasá lae? Konstrusaun Aeroportu Internasionál ne'ebé atu lori investidór no turista, ikus mai dada inundasaun tama komunidade sira nia uma.

Deputadu Bankada Partidu Demokrátiku (PD), Adriano Nascimento hateten, Aeroportu Internasionál Kay Rala Xanana Gusmão, iha Munisípiu Covalima implika hamosu inundasaun ba komunidade.

Nia dehan, inundasaun ne'e kestaun konseitu ne'ebe halo mota mak problema hodi hamosu inundasaun.

"Iha ne'ebá mota rua. Ida parte súl no ida parte norte. Mota rua ne'e sira dezvia para halo naruk aeroportu, entaun sira kee fali rai mamuk ida halo mota foun. Iha mota parte súl tasi nian mak sira kee mota ne'e, mota uluk ponte metru 6, ha'u hatene tanba ami-nia toos besik iha ne'ebá", dehan Adriano, iha Parlamentu Nasionál, Kinta (5/3).

Tuir nia, sira ke'e mota foun ne'e klot liu mota ne'ebe uluk ho ponte metru 6 ne'ebé sobu tiha ona. Tanba ke'e mota foun klot depois tau de'it manila ki'ik no modelu hanesan bee dalan ka drainajen baibain, entaun mota tun bee sa'e liu hodi hamosu inundasaun.

Deputadu Adriano afirma, iha fim 2017 udan boot, mota tun bee resin entaun komesa sae ona taka dalan no taka aeroportu, nune'e sira kee fali tan rai mamuk ida kuaze metru 100 para bee halai ba atu nalihun iha ne'ebá, maibé kuandu udan tun bee sai nafatin to'o ponte ki'ik ida sira halo ne'e bee lori ba hotu.

"Kada tinan sempre hanesan ne'e, ha'u foti kestaun ne'e dezde 2016.  Iha 2017 to'o agora ami komisaun infraestrutura ba haree dala tolu ou haat ona mai rekomenda no levanta iha plenaria, maibé to'o agora buat ida laiha", tenik nia.

Nune'e ponte iha ne'ebá hela rohan de'it ona, kuandu udan tan bee sobu ba hotu, entaun levanta beibeik ona kestaun ne'e, maibe too agora governu la iha intervensaun hodi halo luan mota, la hatene bainhira mak governu atu halo. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.