Loron Direitus Umanus, Toos Nain Kovalima Luta ba Moris Di'ak

Kongresistas foti liman hananu inu Agrikultura nakonu ho haksolok iha kongresu Uniaun Kamponezes Kovalima nian ba loron dahuluk ne’ebé hala’o iha salaun Gedung Wanita Munisipiu Kovalima, Suai (10/12) Kongresistas foti liman hananu inu Agrikultura nakonu ho haksolok iha kongresu Uniaun Kamponezes Kovalima nian ba loron dahuluk ne’ebé hala’o iha salaun Gedung Wanita Munisipiu Kovalima, Suai (10/12) Foto Midia KSI

Tempo Timor (Kovalima) -Komemorasaun loron mundial Direitu Umanus (10 Dezembru 2019), kamponezes husi Munisipiu Kovalima deklara hari Uniaun Toos Nain hodi luta ba povu nia moris diak, dignu, prosperu no igualitariu.

Ambiente iha salaun “Gedun Wanita” Munisipiu Kovalima iha loron Tersa, 10 Dezembru 2019 la hanesan ho loron bain-bain. Tanba, toos nain lubun oan mak halibur malu iha fatin ne’e hodi partisipa Kongresu Dahuluk Uniaun Kamponezes Kovalima nian, nune’e bele kontribui ba dezenvolvimentu munisipiu Covalima nian.

Nu’udar organizasaun mahon ba grupu toos nain ho baze 70 ne’ebé kompostu husi Postu Administrativu 7 iha munisipiu Covalima, membru hamutuk ema 1078 (feto 537 no mane 506). Husi numeru membru ne’ebé iha reprezentante sira ne’ebé maka tuir kongresu hamutuk ema na’in 300.

Tuir agenda, kongresu ne’e hala’o durante loron 3, hahú husi 10-13 Dezembru 2019. Tema jeral husi kongresu ne’e mak, “Reafirma Espiritu Hakawak Hodi Hametin Direitu Toos Nain Sira Ba Moris Dignu, Prosperu no Igualitariu.”

Orador sira ne’ebé prezensa iha kongresu ne’e mak hanesan, Administrador Munisipiu Covalima, Afonso N. Nahak ne’ebé ko’alia kona ba “Politika Autoridade Munisipal Hodi Reforsa Ejistensia Uniaun Toos Nain Iha Baze” au mesmu tempu loke abertura ho simbolikamente liu husi dere Gong, reprezentante Sekertariu Estadu Kooperativa (SEKOOP), Reinaldo Borges ko’alia kona ba “Politika SEKOOP Ba Insentiva Grupu Produtores, Diretur Forum Organizasaun Naun Govermentais Timor-Leste (FONGTIL), Daniel Santos ko’alia kona ba Observasaun Sosiedade Sivil Ba Rejime Titularidade Soin Imovel no Epropriasaun Tanba Utilidade Publiku Hodi Bele Garante Direitu Toos Nain asesu Ba Rai.

Aliende ne’e, Prezidente Uniaun Agrikultura Ermera (UNAR), Alberto M. Guterres ko’alia kona ba “Benefisiu hari’i Uniaun ba Agrikultores”, Diretur Asosiasaun HAK, Manuel Monteiro ko’alia kona ba Direitu Konsumidor Toos Nain Asesu Ba Aihan Saudavel”, reprezentante Serikat Petani Pasundan (SPP), Erni Kartini ko’alia kona ba “Esperensia Luta Serikat Petani Pasundan ba Reforma Rai” nomós reprezentante organizasaun Permatil, Luis Pereira Amaral ko’alia kona ba “Konservasaun Bee no Rai hodi Garante Sustentabilidade Produsaun Aihan.”  

Iha intervensaun Administrador Munisipiu Covalima, Afonso N. Nahak husu ba toos nain Kovalima tomak, liu-liu ba kongresista sira atu uza tempu hirak ne’e ho diak hodi diskute no hili estrutura difinitivu Uniaun Kamponezes Kovalima nian, nune’e bele servisu hamutuk ho parte governu no sosiedade sivil hodi hadia toos nain sira nia vida moris iha futuru.

“Ha’u hanoin ita (red-toos nain) presiza organiza an no tenke servisu makas hodi hasa’e produsaun, tanba projetu boot barak sei mai iha Munisipiu Covalima no sira sei presiza ai-han no modo, ne’e duni ita tenke produs barak,” deklara Administrador Munisipiu Covalima, Afonso N. Nahak.

Entertantu reprezentante SEKOOP, Reinaldo Borges hateten, importante tebes ita presiza hamutuk iha Uniaun ida hodi estabelese mós kooperativa ne’ebé mai husi agrikultor sira, nunee bele kontribui ba dezenvolvimentu ekonomia povu nian.

“Kooperativa sai alternativa ba dezenvolve ekonomia familia nian no hamrik mesak iha nia ain rasik “berdikari” hodi luta ba hadia ekonomia familia” tenik Reinaldo Borges.    

Kongresu dahuluk ne’e hetan mós partispasaun husi reprezentante toos nain sira husi Munisipiu Viqueque, Ermera, Manufahi, Bobonaro, Ainaro no Liquiça, inklui konvidadus balun iha Munisipiu Covalima ne’ebé kompostu husi autoridade lokal, lideransa komunitariu, reprezentante NGO lokal, Komandante F-FDTL Postu Tilomar no reprezentante Klibur Estudante Universitariu Covalima.

Rate this item
(0 votes)
Last modified on Thursday, 12 December 2019 16:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Anunsiu

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com