DILI - Preparasaun sira ba Pacific Angel 2018 (PAC ANGEL 18) halo dadaun ona, operasaun asisténsia umanitária rejionál konjunta no kombinada ida no fornese ajuda iha situasaun dezastre lidera husi Forsas Aérea Pasífiku nian. Aviaun Hercules C-130 husi Forsas Aérea Estadus Unidus nian ne’ebé toʼo iha Dili, iha loron 6 Juñu sei lori pesoál militár sira Estadus Unidus nian hodi hala'o ezersísiu iha Suai, Munisípiu Covalima hahú husi loron 11-16 Juñu, 2018.

PAC ANGEL 18 sei inklui programa sira ba saúde jerál, nehan, matan, pediátriku, no enjeñaria, nomós troka koñesimentu sira kona-ba asuntu oin-oin. “Estadus Unidus, koordena hamutuk ho ami-nia parseiru Timoroan no Australianu sira, dezenvolve Operasaun Pacific Angel hodi ajuda nesesidade povu Timor-Leste nian,” dehan Kathleen M. Fitzpatrick, Embaixadora E.U.A. nian ba Timor-Leste. “Hanesan belun no parseiru sira, ami iha atensaun ho progresu kontínuu nasaun boot ida ne’e nian no ami sente satisfeitu tanba ita-nia kolaborasaun bele oferese servisu sira ne’e.” 

Pacific Angel hanesan parte ida husi kooperasaun ne’ebé la’o dadaun entre Estadus Unidus no Timor-Leste hodi ajuda hadi’a ema Timoroan sira nia moris no dezenvolve kapasidade autoridade lokál sira no forsas seguransa sira nian. Hahú husi tinan 2007, Pacific Angel nia operasaun sira hadi’a ona ema rihun ba rihun nia moris iha rejiaun Pasífiku. Hafoin Timor-Leste, PAC ANGEL 18 nia operasaun sira sei hala’o mós iha Vanuatu, Vietname, no Sri Lanka. (pr)