Tempotimor (Dili) – Ministru Interiór (MI) Interinu, Filomeno da Paixão de Jesus hamutuk ho komandu Polísia Nasionál Timor-Leste (PNTL) deskute kona-ba kondisaun no prioridade PNTL nian iha Governu daualu.

"Enkontru ne'e, atu fó hanoin ba malu atu hadi'a disiplina, hirarkia no prosedimentu seluk tan atu haforsa servisu Polísia ba oin di'ak liután. Ko'alia mós kona-ba polítika Governu primária ba iha Polísia Komunitária,” tenik Ministru Interiór Interino ne'e iha Quartel Jerál PNTL, Kaikoli, Kinta (26/09/19).

Governante ne'e afirma,  liuhosi diskusaun ne'e, ba futuru mak iha fallansu no ema seluk kestiona entaun presiza hadi'a.

MI afirma, ba futuru presiza halo revizaun ba estratéjiku ne'ebé mak PNTL iha, hodi bele kontrolu di'ak liután ba kazu sira.

"Ba futuru polítika Governu nian atu revé estratéjia PNTL nian para oinsá bele halo di'ak liután no bele iha dezibilidade ka kontrola di'ak liután, ba kazu sira ne'ebé akontese iha rai laran," nia afirma.

Tempotimor (Dili) – Bankada FRETILIN iha Parlamentu Nasionál, husu ba VIII Governu, liuliu Ministériu Edukasaun, Juventude no Desportu (MEJD), atu hatuur didi'ak sistema edukasaun iha rai laran, hodi bele hadi'a kualidade edukasaun. Liuliu ba profesór no estudante sira.

"Governu tenke investe maka'as iha área edukasaun. Tanba rekursu umanu ida ne'e, laiha rohan. Tan ne'e, ita nia rikusoin sira seluk bele hotu. Maibé, rikusoin ida ne'e nunka mais bele hotu. Tanba ne'e, tenke investe maka'as iha área edukasaun," dehan Francisco Miranda Branco, Vise Prezidente Bankada FRETILIN iha Parlamentu Nasionál, Kuarta (25/09/19).

Deputadu ne'e, husu Governu atu revé filafali sistema edukasaun nasionál nian.

"Governu iha obrigasaun tenke revé fali sistema edukasaun nasionál atu nune'e bainhira estudante sira remata iha universidade servisu kedas. Maibé, se la hetan servisu Governu apoiu sira hodi hetan kréditu, hodi kria servisu ba ninia-an rasik," dehan Branco.

Nia afirma,  Governu presiza halo komunikasaun ho igreja. Tanba, parte igreja iha esperiénsia iha área edukasaun.

"Igreja Katólika iha esperénsia di'ak kona-ba área edukasaun. Entaun, presiza partila sistema edukasaun ho igreja Katólika. Tanba, sira ho esperensia ne'ebé naruk," tenik Branco.

Tempotimor (Dili) – Traballadór sira ne'ebé durante ne'e servisu iha Kompañia Miramar Blok, ejize ba kompañia nain atu esplika razaun fundamentál ne'ebé hapara sira husi kompañia refere.

"Objetivu husi enkontru ne'e, atu halo aproximasaun ba Kompañia Miramar Blok ho traballadores sira, kona-ba problema entre kompañia Miramar Blok ho ninia traballadores hamutuk na'in 12," dehan Manajer Kompañia Miramar Blok, Osvaldo Tavares iha eskuadra PNTL Munisípiu Dili, Kuarta  (25/09/19).

Nia dehan,  iha aproximasaun entre Kompañia Miramar Blok ho traballadór sira hatudu rezultadu pozitivu husi parte rua.

"Husi aproximasaun ne'e, hatudu rezultadu positivu tanba parte rua simu malu ho di'ak hodi halo koordenasaun ba malu, hodi bele hetan solusaun di'ak husi problema ne'e," dehan Osvaldo.

Iha fatin hanesan, portavóz Sindikatu Jerál Traballadores Timor-Leste (SJTL), Criscencia de Fatima Freitas katak, iha aproximasaun entre kompañia Miramar Blok no traballadór mak laiha solusaun, sira kontinua ejize atu hetan resposta.

"Ohin enkontru ne'e mak laiha solusaun, ami sei ejize nafatin ba kompañia Miramar Blok. Maibé, mak laiha nafatin, ami sei halo asaun greve," nia afirma.

Entretantu, traballadór Fidelino Araújo informa, durante ne'e sira tenta halo negosiasaun ona ho kompañia. Maibé laiha rezultadu.

"Ami hato'o ba Sindikatu hodi buka dalan ne'e, hodi rezolve negosiasaun entre kompañia no traballadór sira ne'e bele simu malu ona, hodi rezolve iha loron Segunda semana oin," nia afirma.

Tuir ninia parte, Fidelino dehan, kompañia halo ona violasaun ba sira nia direitu tanba ko'a  traballadóres sira nia saláriu tuir nain husi kompañia nia hakarak.

"Kompañia viola ami nia direitu kona-ba ami nia kontratu ho saláriu ne'ebé hetan ko'a tuir sira nia hakarak no hapara ami nia servisu iha loron 7 fulan Agostu too agora," nia komenta.

Tempotimor (Dili) – Asesor polítika Iha Ministériu Obras Públika (MOP), Jorge do Conceição Teme rejeita kompañia ne'ebé manan tender ne'e ninia oan nian, tanba ninia oan laiha kompañia.

Tuir asesor polítika ne'e katak, ninia oan servisu duni iha kompañia Baekmoon, maibé la'os ninian.

"Nia servisu iha kompañia ne'e, la'ós viola lei ka regra. Nia laiha kompañia. Maibé hanesan on the job training, nia servisu de'it iha kompañia Baekmoon," deklara Jorge do Conceição Teme, iha edifísiu Ministériu Obras Públika, Kaikoli, Tersa (24/09/19).

Iha fatin hanesan, Diretór Nasional Aprovisionamentu MOP, Quintiliano Afonso Belo katak, projetu ne'e sei iha hela prosesu apresentasaun dezeñu BOQ.

"Prosesu sei la'o hela. Agora dadauk sei halo apresentasaun sira nia metodolójia aproximasaun hodi halo dezeñu BOQ ba truxer sira ne'ebé sira konkore ona," esplika Quintiliano.

Diretór nasional ne'e informa tan, molok halo avaliasaun sira forma uluk ekipa.

"Iha aprovizionamentu molok fó avaliasaun ne'e ami forma ekipa ida komisaun ba avaliasaun ne'e mak iha kompetensia tomak husi ministru mak fó despaxu hodi halo desizaun koletivamente," nia esplika.

ONU Prontu Apoiu PNTL  

September 24, 2019

Tempotimor (Dili) – Organizasoens Nasoes Unidas (ONU) iha Timor-Leste prontu nafatin apoiu Polisia Nasionál Timor-Leste (PNTL), tanba papél PNTL importante iha Timor-Leste.

"PNTL nia papél importante hodi garantia ba respeitu sidadaun sira nia direitu. Tanba kada nasaun hotu-hotu presiza instituisaun ne'ebé mak efikasia atu garantia paz, justisa no seguransa seriedade hodi fundamentál atu realiza dezenvolvimentu nasaun nian," hatete Reprezentante ONU iha Timor-Leste, Roy Trivedy iha Timor Plaza, Tersa (24/09/19).

Nia dehan, Timoroan sira tenke apoiu PNTL atu fó seguransa ne'ebé funsiona ho di'ak.

"Ita boot sira nu'udar Timoroan halo esforsu tomak hodi apoiu PNTL, para  sai forsa ida ne'ebé funsiona ho di'ak. Tamba ne'e, ONU hola papél ida hodi apoiu ba PNTL iha parte ne'ebá ho posibilidade bele ajuda," Roy promote.

Nia mós afirma katak, iha dékada ikus mai ONU ajuda PNTL liuhosi área administrasaun logistika, administrasaun públika no jéneru direitus umanus.

Reprezentante ne'e subliña, ONU sei apoiu ba PNTL iha parte ne'ebé mak presiza. Tanba iha tinan lima ikus ne'e, reprezentante ONU iha Timor-Leste hamutuk ona ho PDHJ hodi fó treinamentu ba PNTL kona-ba respeita no protesaun direitus umanus.

Tempotimor (Dili) – Ministru Reforma Lejislativa Asuntu Parlamentar (MRLAP), Fidelis Manuel Leite Magalhães hatete, ezekusaun Orsamentu Jerál Estadu (OJE) tinan 2019 MRLAP nian, atinje ona %80.

"Ezekusaun OJE 2019 MRLAP rasik ne'e atinje ona %80, ne'ebé ezekusaun ne'e haree ba nia rítmu saudavél loos no kumpri kalendáriu ne'ebé sira ne'ebé la'o," hatete Fidelis iha Parlamentu Nasionál (PN), Tersa (24/09/19).

Nia afirma, atividade ne'ebé MRLAP halo durante ne'e mak halo esbosu lei sira no seluk tan.

"Buat ne'ebé mak MRLAP halo mak iha proposta lejislativa, bainhira diskusaun orsamentu prezensa husi MRLAP nian, kontribui ba halo programa reforma administrativa ne'e MRLAP nian. Esbosu lejislativa ne'ebé mak sei aprezenta iha Setembru, esbosu ba kuadru legais sira sei aprezenta Iha Outubru. Ne'e esforsu ida ne'ebé mak MRLAP halo," dehan Fidelis.

Nia afirma, bainhira asume pasta interinu ba MKAE no MTCI servisu mak hala'o enkontru barak hodi aumenta ezekusaun.

"Bainhira ha'u asume kargu hanesan Ministru interinu ba MKAE no MTCI atu koordena bar-barak para dudu sa'e ezekusaun, la'os ba MRLAP nian de'it. Maibé, ba mós MKAE no MTCI," dehan Fidelis

Tuir Fidelis, rítmu ezekusaun nian komesa la'o di'ak tanba balun iha de'it %30, maibé komesa iha ona mudansa. Nune'e hein katak iha tinan ne'e nia rohan, bele atinje ona %50 ba leten.

Tempotimor (Dili) – Komandante Operasaun PNTL, Superintendente Xefi Pedro Belo hatete, konfrontasaun Ai-mutin ne'ebé rezulta ema ida mate, no ida fali kanek todan, tan de'it tolok membru Polísia nomos komunidade iha área Ai-mutin.

“Relasiona ho konfrontasaun ne'ebé mosu iha Ai-mutin hodi rezulta joven ida mate no ida fali kanek ne'e, tanba grupu ne'ebé halo konvoiu atu filafali ba munisípiu mak tolok membru Polísia inklui mós komunidade sira iha área Ai-mutin,” informa Pedro Belo ba jornalista, Tersa (24/09/19).

Kronolojia, tuir eis Komandante PNTL Munisípiu Dili ne'e konta, bainhira remata inagurasaun gruta iha Aituri-Laran, grupu joven sira ne'ebé mai husi munisípiu ida-idak fila ba sira-nia munisípiu.

“To'o iha unidade  espesiál Comoro nia oin, iha grupu balun ne'ebé iha parte klaran konsege tolok ami nia maluk Polísia sira iha ne'ebá. Depois, sira hakat liubá sira komesa tolok iha konvoi laran. Karreta ida, komesa halai sai ba dalan seluk. Iha ne'ebá mak balun hakilar no tolok mak mosu konfrontasaun hodi hetan rezultadu ida mate no ida kanek," Pedro Belo konta kronolijia ba jornalista.

Pedro afirma,  bainhira mosu konfrontasaun hetan kedas atuasaun husi ekipa patrollamentu Eskuadra Dom Aleixu. Inklui mós Forsa Rezerva nomós Unidade Espesiál ne'ebé konsege kaptura suspeitu na'in rua no detein hela iha sela Polísia.

Kona-ba vítima, tuir Pedro Belo, parte Polísia Nasionál Investigasaun Kriminal responde kedas, depois lori kedas ba iha murtuáriu HNGV.  "Matebian ne'e, autopsia hotu ona no oras ne'e daudaun sira lori sai ona ba fali munisípiu Ainaro," dehan Pedro

Komandante ne'e afirma, kona-ba suspeitu parte seguransa kontinua buka tuir atu halo kapturasaun. Maibé, hein rezultadu husi investigasaun. Tanba polísia identifika hela ema balun.

"Suspeitu rua ne'ebé mak kaer ona ne'e  Fragante Delitu. Maibé, sira seluk ita sei buka tuir. Ha'u fiar katak sei deskobre ema lubuk ida para atu ba hatán iha tribunál," nia dehan.

 

Tempotimor (Dili) – Ministru Reforma Lejislativa Asuntu Parlamentar (MRLAP), Fidelis Manuel Leite Magalhães afirma, lista membru governu pendente nain 9, mantein.

“Pozisaun husi exelénsia Primeiru Ministru mak nafatin. Laiha razaun ruma atu muda kandidatu sira. Mantein nafatin lista kandidatu. Iha tempu besik ha'u hanoin exelénsia PM sei komunika kona-ba desizaun ruma. Lala'ok saida mak hola atu solusiona situasaun ida ne'ebé adapta to'o ohin loron," resposta MRLAP ba deklarasaun bankada KHUNTO iha plenária Parlamentu Nasionál, Tersa (24/09/19).

Fidelis afirma, laiha razaun étika ka morál atu troka kandidatu membru Governu. "Laiha razaun nein étika, morál, nein legál ida atu bele troka kandidatu na'in sia. Señor Primeiru Ministru mantein nafatin lista na'in 9. Tanba, laiha razaun ka kualker razaun atu bele justifika naran kandidatu nian.  Tanba haree ba konstituisaun, leis no prinsípiu fundamentais sira," Fidelis afirma.

Ho razaun hirak ne'e, tuir MRLAP, Primeiru Ministru sei la muda naran lista membru Governu, inklui aliansa ne'ebé mak sustenta parlamentu mós Governu. Nia dehan, desizaun la muda.  Tanba desizaun halo husi konsellu diretivu nasionál.

Antes ne'e, bankada KHUNTO iha uma fukun Parlamentu Nasionál deklara ona katak sei troka membru na'in rua ne'ebé la hetan pose husi Prezidente Repúblika iha loron 22 Jullu 2018, iha Palásiu Nobre, Lahane, Dili.

"Ba ami KHUNTO, preparadu ona atu troka ami nia ema na'in rua ne'e. Tanba ne'e liuhusi ha'u nia intervensaun ne'e, média sira mós rona hotu, ami prepara ona ami nia ema, karik PLP no CNRT prepara ona. Tanba, bainhira pedidu PR nian mai atu husu konfiansa ba rai liur ne'e nunka mais akontese, to'o mandatu tinan lima ne'e hotu mós Prezidente Repúblika la sai ba liur," deklara deputadu bankada KHUNTO, Olinda Guterres iha Plenária PN, Tersa (24/09/19).

Tempotimor (Dili) – Ministru Defeza no Seguransa (MDS), Filomeno da Paixão de Jesus afirma, kazu Ai-mutin, Suku Comoro la inklui grupu arte-marsiais. Tanba, dadaun ne'e bandu arte-marsiais atu hala'o atividade. Nune'e, kazu refere nu'udar krime organizadu.

"Iha momentu ne'e, ema hotu ba missa no inagura gruta. Maibé, oinsá mak akontesimentu iha fali parte Ai-mutin nian. Ne'e ema hotu la espera,” Filomeno afirma, Tersa (24/09/19) iha salaun Suai Room, Timor Plaza, Dili.

Tuir Filomeno, ema barak dehan kazu ne'e Kolimau 2000 no arte-marsiais. “Ne'ebé ha'u ladún  hatene. Maibé, iha konfrontasaun ne'e Polísia tun halo kedas atuasaun," Filomeno esplika.

Entretantu, kazu refere entrega ona ba Ministériu Públiku depois ba tribunál. Nia dehan, parte seguransa buka tuir nafatin, suspeitu sira ne'ebe inklui iha kazu refere atu halo kapturasaun hotu.

"Kazu sira hanesan ne'e la'ós arte-marsiais. Maibé, grupu organizadu kriminozu ka asasinu atu mai halo destabilizasaun iha Timor-Leste. Maibé, buat hirak ne'e identifika ona," hatete Filomeno.

Nia promote sei fó medidas rigorozu ba autor krime sira. “Tanba, aproximasaun agora foti ne'e laiha mudansa. Entaun, agora foti medidas seluk para bele muda situasaun,” nia afirma.

1 Mate, 1 Kanek Todan

Konfrontasaun ne'ebé akontese iha Aimutin, Segunda (23/09/19) ne'e rezulta joven 1 mate no 1 fali kanek todan.

“Joven ida mate, agora iha hela mortuáriu Hospitál Nasionál Guido Valadares (HNGV), para submete ba autopsia. Ida fali kanek todan iha hela sala ICU-HNGV,” Euclides hatán ba perguntas tempotimor.com liuhosi liña telefone, Segunda (23/09/19) kalan.

Euclides dehan, kazu ne'e akontese bainhira grupu lubun boot arte-rituál ida fila husi selebrasaun misa inagurasaun Gruta Sagrado Coração de Jesus iha Taibesi, Dili. Grupu lubun boot ne'e liuhosi área Aimutin, besik fatin fa'an roupa obralan.

"To'o iha área Aimutin, dehan iha grupu ida mak sadik fali sira. Entaun sira tuun fali iha obralan nian ne'e baku fali ema. Ema mós halo auto-defeza ba nian an. Ne'ebé rezulta vitima ida mate fatin no ida kanek todan," dehan Euclides.

Xefi Suku Comoro, Eurico de Jesus ba jornalista katak vitima ne'ebé mate ne'e, la'ós populasaun husi área Aimutin. Nia deskonfia mai husi fatin seluk.

Membru PNTL 62, Komete VDU

September 24, 2019

Tempotimor (Dili) – Provedór Diretus Humanus no Justisa (PDHJ) nota, membru Polísia Nasionál Timor-Leste (PNTL) hamutuk 62, komete iha Violasaun Diretus Umanus (VDU) no Violasaun Boa Governasaun (VBG) durante 2018-2019.

"Dadus ein jerál  husi membru PNTL sira ne'ebé komete VDU no VBG husi tinan 2018 to'o 2019 hamutuk 62," relata Provedora PDHJ,  Jesuina M.  F. Gomes iha salaun Suai Room, Timor Plaza, Tersa (24/09/19).

Nia dehan, tuir dadus iha tinan 2018 nian hamutuk 38 pesoas. Kompostu husi 35 pesoas mak komete Violasaun Direitus Umanus (VDU) no nain tolu komete Violasaun Boa Governasaun.

Kona-ba tipu violasaun, tuir Jesuina, violasaun direitus umanus, direitu ba liberdade, integridade no seguransa liga Taklu (Tratamentu at, Kruel no Dezumanu) hamutuk 31. Direitu asesu ba tribunál liga ba la investiga krime ho imparsiál, efetivu, efikas kompletu ka seriu hamutuk 2, direitu ba moris, liga ba ameasa oho 1.

“Liberdade Konxiensia, Relijiaun, Diskriminasaun laek, Direitu ba Liberdade liga ba Diskriminasaun bazeia ba Relijiaun no Kultu 1 no Violasaun ba Boa Governasaun mak hanesan sees husi poder liga ba uza funsaun públika no ilegalidade liga ba ilegalidade bazeia ba material hamutuk 3," nia informa.

Entretantu, dadus iha tinan 2019 kona-ba VDU no VBG hamutuk 24.

"Tipu Violasaun; Violasaun Direitus Umanus, Direitu ba Liberdade, Integridade no Seguransa liga Taklu (Tratamentu at, kruel no Dezumanu) hamutuk 21, Direitu ba Moris liga ba Ameasa oho 1, Direitu ba Propriedade, Interferensia Arbitraria no ema nia Propriedade Privadu 1 no Violasaun Boa Governasaun hanesan sees husi poder liga ba uza funsaun publika 1," Jesuina esplika.

Right256

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« April 2021 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Tempo Timor Networks

Online Counter