Tempotimor (Dili) – Ajenda plenária iha Parlamentu Nasionál (PN), Segunda (07/10/19) kansela. Tuir Vise II Prezidente Parlamentu Nasionál, Luis Roberto kanselamentu ne'e bazeia ba regulamentu PN nian artigu 5 (lima), kona-ba subtituisaun.

Iha regulamentu ne'e, Luis hatutan, bainhira deputada ida la prezensa iha PN loron tolu tutuir malu, presiza halo karta notifikasaun ida ba bankada rasik hodi subtitui deputada balun.

"Maibé Deputada Helena Martins Belo ho Lucia Taeki, ne'ebé halo hela viajen espesiál ba Italia ne'e ba hala'o servisu misaun PN nian. Tanba ne'e, la presiza subtitui. Se ita kada komisaun ida bainhira hetan viza hala'o viajen ba liur, hotu-hotu iha subtitui ne'e razaun oinsá? Hau konsidera subtitui ne'e hanesan eiru ida," hatete Luis Roberto iha PN, Segunda (07/10/19).

Vice Prezidente PN ne'e esplika, antes karta husi Komisaun F relasiona ho viajen deputada nain rua nian ne'e ba Italia, tama ona iha meza PN, Prezidente PN mós hatún ona despaixu pozitivu iha dia 19 setembru, katak deputada nain rua ba hala'o enkontru ida iha Italia. Ida ne'e, luis dehan, hanesan hala'o misaun PN nian.

"Ho razaun hirak ne'e, mak ohin kansela plenaria ba loron ohin. Se la kansela ou suspensaun ba plenária, signifika katak ohin ne'e lidera deputadu hamutuk 66," dehan Roberto.

Roberto dehan, nune'e meza nafatin mantein pozisaun bazeia ba regulamentu no estatutu deputadu sira nian iha artigu 9 alinea 1 katak kuandu deputada vizita espesiál ba rai liur, la presiza Subtitui.

Bazeia Ba Rejimentu

Entretantu, deputadu Francisco Miranda Branco hatete subtitui temporaria ba Deputada Ilda Maria da conceição hodi servisu temporaria ba Deputada Cidalia Mesquita Ximenes nia fatin no subtitui temporariu ba Deputada Rosela da Costa hodi servisu temporaria ba Deputada Helena Martins Belo nia fatin.

"Subtituisaun ne'ebe mak ami halo ne'e, bazeia ba estatuta no rejimentu. La'ós liuhosi dalan maioria ou menoria. Tanba Deputada Helena Martins Belo ba hala'o estudu komparativu iha Italia," dehan Vise Prezidente Bankada FRETILIN, Francisco Miranda Branco iha PN, Segunda (07/10/19).

Nia dehan, subtituisaun ba deputada la viola regra ruma. Tanba, antes ne'e desizaun husi meza mós iha ona konkordansia. Maibé, mai fali iha plenaria mak kestiona.

Nia afirma, relasiona ho subtituisaun ne'ebé iha, la'ós atu aumenta númeru deputada. Tanba, tuir Branco, deputadu nafatin mantein 65 la iha mudansa ba numeru deputadu.

Subtituisaun ida ne'e, Branco hatete, tuir servisu polítika Parlamentu nian, bele hala'o servisu iha liur. Maibé, nia votus prevalese nafatin labele lakon tenke iha votus nafatin. Tan ne'e, halo subtituisaun.

"Estatutu fó dalan atu subtitui ida hala'o servisu polítiku nian iha rai liur. No ida subtitui tanba presiza iha direitu ba votus,” tenik Branco.  

Tempotimor (Dili) – Partidu Kongresu Nasionál Rekonstrusaun Timorense (CNRT) fó ultimatu ba Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak, tenke hatuun montante Orsamentu Jerál Estadu (OJE) 2020 husi billaun $1.95 ba billaun $1.3.

Bainhira Governu AMP ne’ebé CNRT mós apoiu ne’e, la halo tuir, kartaun mean husi deputadu bankada CNRT iha Parlamentu Nasionál sai opsaun ikus ne’ebé partidu lideradu husi Kay Rala Xanana Gusmão ne’e sei foti iha debate OJE 2020.

Deputadu Bankada CNRT, Domingos de Carvalho deklara, pozisaun ida ne’e nu’udar desizaun bankada CNRT nian. La’os desizaun deputadu ida nian.

"Husi ami, bankada CNRT ne'ebé iha Aliansa Mudansa ba Progresu (AMP), ami deside ona katak hakarak ka lakohi tenke halo redusaun (ba OJE 2020). Maibé, se la konsege redus no mantein, mak orsamentu ne'e sei la pasa. Tanba, ita haree katak husi I Governu to'o VIII Governu, foin mosu OJE boot hanesan ne'e," dehan deputadu Domingos iha Parlamentu Nasionál (PN), Segunda (11/11/19).

Deputadu ne’e mensiona mós deklarasaun husi deputada bankada CNRT seluk, Virgina Ana Belo atu vota kontra OJE 2020. "Bainhira OJE mak la redúz, sira (governu) mantein, ne'e ami tenke vota kontra duni. Tanba, ami deklara antes ona," dehan Domingos.

Nia afirma, loloos OJE tinan fiskal 2020 nian ne'e mak billiaun $1.3 ka $1.4. “Maibé, se liu ida ne'e, pasiénsia saida mak ami deklara ona, ami sei vota kontra."

 

Tempotimor (Dili) – Deputada CNRT iha Parlamentu Nasional (PN), Virginia Ana Belo ameasa vota kontra Orsamentu Jerál Estadu (OJE) 2020, bainhira livru Panorama Orsamentál 2020  la tuir estrutura no aumentu laiha balansu.

"Ita boot sira iha esperiénsia naruk. Liuliu maluk tékniku sira. Maibé, ha'u fó de'it ezemplu ida iha transferénsia públika. Orsamentu atu halo eskola no orsamentu atu konstrui klínika. Halo nusa mak ba tau fali iha transferénsia públika?" husu Prezidente Komisaun D, Virginia Ana Belo iha plenária PN, Segunda (04/11/19).

"Sosa ró-ahi versu II tau fali iha bens no servisu. Saida mak ne'e señora ministra? Ha'u bilán tiha de'it kuandu haree livru orsamentu ida ne'e. Buat hotu ida loloos, iha kapitál menor no kapitál  dezenvolvimentu mós mai fali iha transferénsia públiku.  Tanba ne'e, osan sira ne'e presiza muda ba nia fatin. Se la muda, ha'u nia pozisaun mak vota kontra," dehan Virginia.

Nia afirma, deputadu hotu-hotu iha ninia pozisaun. Tan ne'e, nia hakarak hateten katak ne'e fora husi orientasoens. Ida ne'e, ninia deklarasaun privadu.

“Sei kolokasaun orsamentu ida sabraut ida hanesan ne'e, ha'u nia pozisaun mak hanesan ohin ha'u dehan, sei vota kontra orsamentu liuliu iha ministériu finansas," nia dehan.

Nia hatete, nu'udar deputada nia apoiu ba Governu. Tan ne'e, sei nia mesak mak vota kontra laiha impaktu. Tanba, tuir Prezidente Komisaun D ne'e, iha deputadu no deputada barak mak sei apoiu ba Governu.

"Ha'u mesak mak vota kontra laiha impaktu. Kolega deputadu barak mak apoiu ba Governu. Ne'ebé laiha impaktu," nia dehan.

Tempotimor (Dili) – Deputadu Bankada CNRT, Aderito Hugo husu ba Komando Polísia Nasionál Timor-Leste (PNTL) no Falintil Forsa Defeza Timor-Leste (F-FDTL), atu halo investigasaun klean ba oknum forsa sira ne'ebé utiliza sala arma, hodi tiru komunidade nia animál.

"Akontesimentu dala hira ona, hanesan iha Fatuberliu keixa mai to'o iha komisaun B kona-ba forsa sira ne'ebé dehan ba kasa rusa, maibé kasa filafali komunidade sira nia karau. Kazu ne'e akontese," dehan Aderito iha Parlamentu Nasionál, Tersa (29/10/19).

Ho razaun hirak ne'e, eis Prezidente Parlamentu Nasionál (PPN) ne'e husu ba komando PNTL no F-FDTL, para oinsá halo kontrolu ba armas iha PNTL no F-FDTL. Tanbá, tuir Aderito, sei perigu liu bainhira armas hirak ne'e, ema sivíl sira mak uza hodi tiru animál refere.

"Hau fiar katak Komando PNTL no F-FDTL iha ona regras. Tanba, ita hatene katak ema sivíl la kaer kilat, so militár no polísia. Entaun ita husu ba komandu institusaun rua ne'e atu investiga didi'ak situasaun ida ne'e. Oinsá iha kontrolu ba uza armas hirak ne'e," dehan Aderito.

Tempotimor (Dili) – Deputadu Partidu Libertasaun Populár (PLP), Sabino Soares ‘Guntur’ husu Governu atu hadi'a sistema ezekusaun Orsamentu Jerál Estadu (OJE) nian. Tanba, tuir deputadu ne’e, Membru Governu (MG) barak, mak kapasidade lato'o atu ezekuta OJE.

"Ezekusaun tinan 2019 ne'ebé boot ba daudauk ne'e, tanba sistema mak obriga. Tanba la'ós la'o tuir ema nia kapasidade. Maibé, tanba sistema mak obriga katak tenke ezekuta hotu, maske kapasidade la to'o iha ne'ebá. Entaun, to'o ona tempu tinan nia rohan ita foin haree katak osan ne'e fakar ba iha ne'ebé, ita mós la hatene," dehan deputadu Guntur iha PN, Segunda (11/11/19).

Nia dehan, maske iha audiénsia AMP nia, propoint ona atu hadi'a sistema refere, maibé parte barak mak lakohi.

"Momentu ida ami audiénsia. Ha'u dehan, sistema ida kona-ba ezekusaun ba kuantidade orsamentu ba pursentu ne'e hadi'a, para bele ezekuta tuir ema nia kapasidade ka kbi'it, para bainhira la konsege ezekuta hotu, ne'e fila ba kofre estadu," tenik Guntur.

Nia realsa, bainhira Governu lakohi muda sistema ne'e, mak kada tinan fakar osan de'it. Tanba nia ezekusaun la klaru no duni tuir de'it pursentu boot.

Tempotimor (Dili) – Deklarasaun Primeiru Ministru (PM) Taur Matan Ruak katak nia prontu atu hasoru Eleisaun Antesipada (EA), konvida opiniaun oioin husi deputadu iha Parlamentu Nasionál (PN).

“Eleisaun Antesipada? Ami (CNRT) ne'e esperensia tiha ona. Estetementu ne'e Primeiru Ministru mak halo. Intensaun saida? Ite boot sira husu ba Primeiru Ministru. Ne'ebé, ba CNRT di'ak hela,” hatete Prezidente Bankada CNRT, Duarte Nunes iha Parlamentu Nasionál, Kuarta (23/10/19).

Iha sorin balun, Deputadu KHUNTO António Verdial katak atu ba fali eleisaun antisipada, di'ak liu lee filafali Konstituisaun RDTL.

"Estatementu balun ne'ebé hakarak Eleisaun Antesipada, ha'u atu hatete katak, di'ak liu ita lee no haree konstituisaun, hala'o servisu tuir Konstituisaun Repúblika Demokrátika Timor-Leste (K-RDTL), haruka,"  dehan Verdial.

Tempotimor (Dili) – Iha posibilidade, Partidu Congreso Nacional Reconstrução Timorense (CNRT), lori Prezidente Repúblika (PR), Francisco Guterres Lú Olo ba tribunál. Tanba, viola membru Governu indijitadu na'in sia (9), nia direitu umanus.

"Desizaun Prezidente Repúblika nian ne'e foti tuir kompeténsia. Mas, kompeténsia ida ne'ebé bele kontrária ho konstituisaun, tanba direitu umanus. Ne'e, ema nia direitu. Ha'u tau ita boot iha ne'ebá, dehan ha'u la gosta o, ha'u hasai tiha o, nusa!" dehan Prezidente Bankada CNRT, Duarte Nunes ba tempotimor.com iha Parlamentu Nasionál (PN), Sesta (25/10/19).

Nia esplika, nu'udar nasaun ida, Timor-Leste mós iha tribunál. “Kuandu ema ne'e ita la satisfeitu, tanba direitu internasionál mós proteje ita, ne'ebé bele (ba tribunál)," dehan Duarte.

Duarte afirma, bainhira atu lori ba tribunál, presiza rona mós husi membru Governu indijitadu sira ne'ebé Prezidente Repúblika la fó pose. Nia dehan, tanba ema sira ne'e mak iha direitu.

Tempotimor (Dili) – Previzaun VIII governu atu hasa'e Kresimentu Ekonomia bele atinje %7.2 iha tinan 2020, tuir bankada KHUNTO iha Parlamentu Nasionál nu'udar tarjetu ambisiozu governu nian.

"Kresimentu Ekonómiku tuir governu nia tarjeitu, ita bele alkansa. Maibé, presiza servisu maka'as. Previzaun ne'e, ita labele ambisiozu demais. Maibé, ita tenke halo. Tanba ita tau tarjetu ida kresimentu ekonomiku sa'e ba %7.2 ne'e kuandu orsamentu aprova ona iha fulan ida ne'e," hatete Xefi Bankada KHUNTO, António Nobre iha PN, Kuarta (04/12/19).

Tuir Nobre, defisíl uitoan atu kresimentu ekonomiku bele atinje %7.2. Tanba, iha inisiu 2020 sei uza orsamentu duadesimál.

Alende ne'e, tuir deputada Fernanda Lay, governu bele ambisaun halo previzaun ba kresimentu ekonomiku nian, maibé bele ka lae? Tanba referensia barak ona.

"Governu bele iha ambisaun para propoin tau nia orsamentu. Maibé, PN bele fó lembra katak husi 2017 to'o inisiu 2019, governu la'o ho duadesimál. Tanba ne'e, ita nia kresimentu ekonomiku monu. Entaun atu rekopera filafali, tenke ho neneik. La'ós tau dala ida de'it. Tanba ne'e, governu bele propoin. Maibé, urjente ka lae? Sei la'ós urjente, tinan oin ita sei iha para hala'o," tenik Fernanda.

Tempotimor (Dili) – Deputadu AMP, Sabino Soares ‘Guntur’ konsidera Prezidente Repúblika, Francisco Guterres Lú-Olo ukun ho autoritáriu, maski Timor-Leste adota sistema demokrasia.

Guntur hatete lia hirak ne'e, relasiona ho membru Governu indijitadu na'in 9, ne'ebé to'o agora seidauk hetan tomada pose husi Prezidente Repúblika.

“Membru Governu indijitadu na'in 9, hetan kondenasaun husi Prezidente Repúblika. Maski Tribunál Rekursu anunsiu katak membru Governu indijitadu sira ne'e laiha kazu,” hatete Guntur iha Parlamentu Nasionál, Kuarta (23/10/19).

Alende ne'e, deputadu Duarte Nunes husi Bankada CNRT katak bainhira Prezidente Repúblika la fó razaun kona-ba membru Governu indijitadu ne'ebé to'o agora seidauk hetan pose, CNRT sei mantein lista ne'ebé iha.

"Ami hein prezidente fó nia sala para ami troka. Sei ami tau ita boot sira iha fatin ida, tanba de'it PR la gosta ema ne'e, atu troka ne'e la justu. Tan ne'e, CNRT sei mantein to'o tinan 10 mós di'ak, tanba ema ne'e mós direitu iha," nia tenik.

Tempotimor (Dili) – Bankada FRETILIN iha Parlamentu Nasionál (PN) husu ba bankada Governu atu labele 'show force' ba proposta lei atividade petrolífeiru no lei fundu petrolífeiru ne'ebé hetan veto husi Prezidente Repúblika. Tanba, tuir bankada oposizaun ne'e, buat ida mak inkonstituisionalidade kontinua inkonstituisionalidade.

"Se ita hakarak show of power ne'e ita la'o. Maibé, ita la muda buat ida. Ida inkonstituisionalidade kontinua inkonstituisionalidade. Tanba la tuir buat ne'ebé mak tribunál hatudu nia konsekuénsia mak diploma ne'e sei la hetan promulgasaun," deklara Prezidente Bankada FRETILIN, Aniceto Guterres Lopes iha plenária PN, Tersa (08/10/19).

FRETILIN husu ba bankada Governu, atu halo reformulasaun ba diploma rua ne'ebé hetan julga husi Tribunál Rekursu no inkonstituisionalidade.

"Husu ba bankada Governu, mai ita hamutuk halo reformulasaun ba diploma sira ne'e, hanesan obrigasaun konstituisionál atu kumpri Konstituisaun RDTL no desizaun tribunal, nu'udar desizaun aas liu iha estadu Timor-Leste," dehan Aniceto Guterres.

Hatán ba deklarasaun ne'e, Prezidente Bankada CNRT Duarte Nunes katak, bankada Governu iha ona kondisaun ba halo reformulasaun ba diploma lei atividade petrolífeiru no lei fundu petrolífeiru.

Iha fatin hanesan, Bankada Partidu Libertasauan Povu (PLP), Maria Angelina Sarmento katak PLP prontu halo apresiasaun ba artigu ne'ebé mak ein kestaun.

"PLP Laiha objetivu show force. Maibé, oinsá mak show force be with dezenvolvimentu ba povu ida ne'e, atu lori dezenvolvimentu ne'ebé di'ak no sustentavel," dehan Maria.

Page 1 of 2

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com