Tempotimor (Dili) – Bankada CNRT iha Parlamentu Nasionál (PN) konsidera Orsamentu Jerál Estadu (OJE) 2019 nian, ne'ebé oitavu Governu ezekuta halo emprezáriu sira sai vítima.

"Ami haree husi parte seluk, emprezáriu sira mak sai vítima. Ida ne'e la'ós inventa. Maibé, ami rasik ko'alia ho ministru ne'ebé tutela. To'o ami oin buis ba malu, tanba de'it la tau importánsia ba ita nia emprezáriu sira," dehan deputadu CNRT, Domingos de Carvalho iha PN, Segunda (11/11/19).

Nia dehan, nu'udar reprezentante povu nia ko'alia ida ne'e tanba emprezáriu barak mak deve ema nia osan, ikus mai la konsege selu. Pasiénsia, ema hadau hotu saida mak emprezáriu sira iha.

Iha parte seluk, deputadu PLP Sabino Soares "Guntur" katak, osan barak iha tinan 2019 nian, ezekuta arbiru de'it.

"Osan sira gasta ne'e, la hatudu faktu ida. Maibé, derepente de'it osan ne'e ba iha ne'ebé ita lahatene," dehan Guntur.

Tempotimor (Dili) – Ideia remodelasaun ba Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak, hahú mosu iha tempu hirak ba kotuk no ideia ne’e hetan afirmasaun mós husi partidu tolu: CNRT, PLP no KHUNTO ne’ebé forma AMP, liu husi rezolusaun númeru 2/2019.

Iha rezolusaun pontu 7 hatete “AMP konsidera nosaun atu halo remodelasaun ba Governu Konstitusional daualuk hodi responde ba nesesidade dezenvolvimentu pais nian, liuliu kontribui ba hadi’a dezempeñu Governu nian.”

Maibé, kompetensia atu halo remodelasaun ne’e AMP la intrega kompletamente ba Taur Matan Ruak nu’udar Xefe Governu ne’ebé hatene no koñese didi’ak ninia membru Governu sira ne’ebé bele halo serbisu no ida ne’ebé labele.

AMP deside hodi fahe ‘poder’ ba remodelasaun ne’e ba lider na’in tolu: Kay Rala Xanana Gusmão, José dos Santos Naimori Bucar no Taur Matan Ruak.

Prezidente Bankada CNRT iha Parlamentu Nasionál (PN) Duarte Nunes rekoñese katak presiza duni halo avaliasaun ba dezempeñu membru Governu sira nian.

Maibé, atu halo remodelasaun ka lae ne’e depende ba desizaun husi lider AMP na’in tolu.

"Ne'e normál. Tinan rua ona klaru presiza, se deskute dehan presiza (remodelasaun) okay. Se la presiza, sira na'in tolu (Xanana, Naimori, Taur) mak sei deside hamutuk par AMP ne'e la'o ba oin," deklara Duarte iha PN, Segunda (18/11).

Iha fatin hanesan, Vise Prezidente dahuluk partidu KHUNTO, António Verdial de Sousa dehan, KHUNTO prontu atu ba remodelasaun, maibé desizaun ne’e fila fali ba lider masimu partidu nian.

"Atu dehan de'it katak partidu Khunto preparadu (ba remodelasaun), maibé atu foti desizaun fila fali ba Konseleiru Másimu Khunto nian mak maun boot José dos Santos Naimori Bucar, maibé partidu Khunto preparadu tiha ona," dehan deputadu António.

Entretantu, deputadu husi Bankada PLP Sabino Soares "Guntur" dehan, bainhira remodelasaun akontese la'os de’it ba membru governu, maibé bele mós ba sistema sira.

"Remodelasaun ne'e buat rua. Ida ko'alia kona-ba hadia ka kompleta estrutura (governu) no ida seluk mak ita bele halo mudansa iha sistema. Ne'ebé remodelasaun ba sistema no membru governu mós iha," dehan Guntur.

Tempotimor (Dili) – Sosiedade sivíl iha Timor-Leste husu ba membru Governu daualu ne'ebé seidauk hetan pose, bele hakat tuir Xanana Gusmão nian ain fatin, ne'ebé deklara rejigna-an.

"Ba membru Governu na'in sia (9), ne'ebé la hetan posse husi Prezidente Repúblika (PR) Francisco Guterres Lú Olo, di'ak liu hola pozisaun ruma ka rejigna-an, hanesan ezemplu ne'ebé Xanana Gusmão hatudu tiha ona. Kuandu nia la simu pose, nia rejigna-an. Agora, Xanana bele halo, tanba saida mak sira seluk labele," dehan Diretór Ezekutivu Fongtil, Daniel Santos do Carmo iha CCD, Kinta (24/10/19).

Iha fatin hanesan, membru Asia Justice and Rigths (AJAR) Inocencio Xavier katak, CNRT tenke haree tuir KHUNTO ne'ebé troka ona nia membru Governu.

"CNRT tenke haree ba partidu KHUNTO ne'ebé troka ona lista ne'e. Tanba, lista pendente husi CNRT mak barak. Entaun, husu ba señor Xanana Gusmão, katak tenke iha paixaun atu substitui ona membru sira ne'e. Labele tan de'it ema na'in 9, sakrifika ema miliaun. Ida ne'e, labele," dehan Inocencio.

Tempotimor (Dili) – Xefe Governu, Taur Matan Ruak dehan, nia sei la preokupa ho opiniaun barak ne'ebé fó sai kona-ba montante Orsamentu Jerál Estadu (OJE) 2020 ne'ebé bo'ot  tebes. Tanba, sei iha prosesu diskusaun.

"Hau la preokupa. Tanba sei iha diskusaun iha Parlamentu. Buat hirak ne'e, opiniaun idaidak ninian. Ami haruka proposta ba, naturalmente ao longo de diskusaun mak ita hare'e. Maibé, ha'u la espekula ida ne'e," dehan Taur iha Palásiu Prezidensiál Bairru-pite, Kinta (21/11/19).

Xefe Governu ne'e mós afirma, desizaun hotu sei fó sai bainhira halo ona diskusaun. Ho nune'e, nia husu atu la presiza halo espekulasaun. Tanba, nia dehan, ida ne'e nu'udar planu Governu nian.

"Montante ne'ebé ami haruka ba Billaun $1,950. Durante diskusaun mak foin hare'e solusaun saida? Alterasaun karik, iha ne'ebé? Tanba saida? Área ida ne'ebé? Ida ne'e diskusaun iha PN," Taur esklarese.

PM Taur dehan, iha tinan ida ne'e primeira vez Governu tau osan $800 e tal mill ba seitór  sosiál  nian, liuliu edukasaun. Tanba tuir PM, seitór ne'e importante.

Remodelasaun

Iha okaziaun ne'e, PM Taur mós konsidera planu remodelasaun ba VIII Governu, hanesan opiniaun ida. Ne'ebé, atu realiza tenke liu husi avaliasaun ba kada membru Governu.

"Ne'e opiniaun ida. Maibé, atu ba remodelasaun tenke halo uluk avaliasaun. Tanba ne'e, ha'u seidauk ko'alia kona-ba ida ne'e," hatete Xefi Governu ne'e.

Nia esklarese, atu halo avaliasaun ne'e kompetensia tomak Primeiru Ministru nian. Tanba, tuir PM Taur, lei mak hateten nune'e.

"Avaliasaun ba membru Governu ne'e, PM mak halo. Klaru katak PM nakloke ba opiniaun no kritika hotu. Maibé iha lei hateten katak kompetensia idak-idak ninian," nia esplika.

Taur dehan, nia fiar koligasaun AMP sei metin nafatin no la'o normál.

Tempotimor (Dili) – Deputadu Bankada Partidu Libertasaun Populár (PLP), Sabino Soares ‘Guntur’ konsidera Orsamentu Jerál Estadu (OJE) 2020, nakonu ho manobrasaun. Nia dehan, tanba ema estranjeiru mak mai jere Governu no orsamentu Timor-Leste nian.

"Agora, saida mak mosu? Orsamentu iha dezenvolvimentu kapitál, sira koloka fali iha transferénsia públiku. Depois, implika hotu sasán. Signifika, iha manobrasaun ba OJE. Tanba ne'e mak ita lalika tau fiar liu ba ema estranjeiru atu mai jere ita nia osan, jere ita nia planu estratéjiku sira. Tanba sira ne'e mai ho intensaun lori estadu ne'e ba tasi kidun," dehan deputadu PLP ne'e iha Parlamentu Nasionál  (PN), Segunda (11/11/19).

Nia dehan, nu'udar reprezentante povu, nia parte haree dook ona katak orsamentu ida agora ne'e, orsamentu ida komplikadu.

"Orsamentu tinan fiskál 2019 nian, ne'ebé ko'alia kona-ba fronteira marítima no estabelesimentu industrializasaun mina nian de'it, susar ona. Satán orsamentu ida agora boot ne'e," Guntur hatete.

Nia mós konsidera katak, orsamentu tinan 2020 la tuir estrutura tanba tau arbiru de'it.

“Governu tenke deteta ona nia ema matenek sira atu bele tau iha Primeiru Ministru (PM) nia gabinete no ministru sira hotu, para haree prosesu sira ne'e,” nia sujere.

Tempotimor (Dili) – Proposta Orsamentu Jerál Estadu (OJE) 2020, retira ona husi Uma Fukun, Parlamentu Nasionál. Primeiru Ministru Taur Matan Ruak deside atu hatama filafali proposta refere iha loron 13 Dezembru 2019.

Komisaun C Parlamentu Nasionál, ne'ebé trata asuntu Finansas Públiku, propoin ba governu atu reduz OJE 2020 husi billaun $1.950 ba billaun $1.6.

"Momentu ne'ebá, governu aseita ho redusaun OJE 2020 husi billiaun $1.950 ne'e ba billiaun $1.6. Maibé, iha plenária ne'e dinámika la'o oin seluk. Sei governu aseita bele liu biliaun $1.6 ne'e. Maibé, sei proposta PN nian atu redúz bele hatún liu billiaun $1.6," dehan Prezidente Komisaun C, deputada Fernanda Lay iha sala Komisaun C, Kuarta (05/12/19).

Nia afirma, rekomendasaun ne'ebé komisaun C hato'o ba governu mak redúz ba billiaun $1.6. Maibé, depois OJE mai fali plenária mak soberanu.

"Bainhira OJE foun tama fali iha PN mak biliaun $1.6 ne'e kompeténsia plenária nian para atu hasa'e ka redúz. Tanba ne'e, plenária mak soberanu, la'ós komisaun nia kompeténsia," tenik Lay.

PM Deside Retira OJE 2020

December 03, 2019

Tempotimor (Dili) – Primeru Ministru Taur Matan Ruak deside retira OJE 2020 ne'ebé submete ona ba Parlamentu Nasionál. Razaun katak deputadu hotu-hotu aseita atu halo redusaun ba orsamentu ne'ebé ho montante boot ne'e.

"Retira proposta orsamentu. Tanba, primeiru númeru orsamentu boot no segundu, nivel ezekusaun. Entaun, deputadu sira hakarak altera. Ami aseita atu reajusta orsamentu ne'e, hodi aprezenta filafali ba Parlamentu Nasionál," esplika PM Taur Matan Ruak ba jornalista hafoin diskusaun jeneralidade iha Parlamentu Nasionál, Tersa (03/12/19).

Xefe governu ne'e afirma, tenke halo redusaun ba OJE 2020 nian, tanba deputadu hotu-hotu mak hakarak.

PM Taur dehan, iha retira orsamentu ne'e sempre iha impaktu ba ekonomia. Maibé, buka maneira par labele kompromete liuliu ligasaun ba moris povu no nasaun nian.

Tempotimor (Dili) – Partidu Kongresu Nasionál Rekonstrusaun Timorense (CNRT) fó ultimatu ba Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak, tenke hatuun montante Orsamentu Jerál Estadu (OJE) 2020 husi billaun $1.95 ba billaun $1.3.

Bainhira Governu AMP ne’ebé CNRT mós apoiu ne’e, la halo tuir, kartaun mean husi deputadu bankada CNRT iha Parlamentu Nasionál sai opsaun ikus ne’ebé partidu lideradu husi Kay Rala Xanana Gusmão ne’e sei foti iha debate OJE 2020.

Deputadu Bankada CNRT, Domingos de Carvalho deklara, pozisaun ida ne’e nu’udar desizaun bankada CNRT nian. La’os desizaun deputadu ida nian.

"Husi ami, bankada CNRT ne'ebé iha Aliansa Mudansa ba Progresu (AMP), ami deside ona katak hakarak ka lakohi tenke halo redusaun (ba OJE 2020). Maibé, se la konsege redus no mantein, mak orsamentu ne'e sei la pasa. Tanba, ita haree katak husi I Governu to'o VIII Governu, foin mosu OJE boot hanesan ne'e," dehan deputadu Domingos iha Parlamentu Nasionál (PN), Segunda (11/11/19).

Deputadu ne’e mensiona mós deklarasaun husi deputada bankada CNRT seluk, Virgina Ana Belo atu vota kontra OJE 2020. "Bainhira OJE mak la redúz, sira (governu) mantein, ne'e ami tenke vota kontra duni. Tanba, ami deklara antes ona," dehan Domingos.

Nia afirma, loloos OJE tinan fiskal 2020 nian ne'e mak billiaun $1.3 ka $1.4. “Maibé, se liu ida ne'e, pasiénsia saida mak ami deklara ona, ami sei vota kontra."

 

Tempotimor (Dili) – Bankada FRETILIN iha Parlamentu Nasionál (PN) liuhosi deputadu Favião de Oliveira hatete, alterasaun ba Lei Pensaun Vitalisia (LPV), kompetensia AMP nian.

"Kona-ba pensaun vitalisia ne'e kompeténsia AMP nian. Tanba uluk, sira dehan iha kampaíña katak, se ami mak manan ka kaer ukun, ami sei halakon lei pensaun vitalisia. Maibé, agora sira mak propoin fali millaun $6, ne'e problema sira nian," dehan deputadu husi bankada FRETILIN ne'e iha Parlamentu Nasionál, Kuarta (04/12/19).

Favião afirma, FRETILIN apoiu totál bainhira AMP hakarak halakon LPV. Entaun, AMP mak ko'alia, AMP mak tenke halo lakon.

"Sira mak ko'alia, sira rasik mak tenke halo lakon.  Tanba ne'e, ami lakohi tau ami nia kanuru tohar. Ida ne'e, kestaun sira nian. Sira rasik mak promete ba povu," dehan Favião.

Hatán ba kestaun ne'e, deputadu CNRT Patrocino dos Reis katak, vizaun hotu la'o ba alterasaun LPV. Maibé, buat hotu la'ós fasíl.

"Vontade hotu iha. Prosesu hotu la'o. Vizaun ne'ebé hateke ba iha ne'ebá, maibé komprimísiu ida ne'ebé atu la'o ne'e la'ós buat hotu fasil, hanesan ita fila ita-nia liman de'it," dehan Patrocino.

AMP uluk kedas iha hanoin atu halakon LPV. Iha kampaíña molok eleisaun, AMP promete atu halakon LPV. Maibé, to'o ohin loron LPV sei nafatin vigora. Aat liu, governu propoin tan millaun $6, hodi sustenta LPV.

Tempotimor (Dili) – Primeiru Ministru, Taur Matan Ruak hatete pozisaun Governu nian mak halo proposta. Parlamentu nia papél mak vota a favor ou kontra.

“Agora, vota ka la vota. Ida ne'e Parlamentu Nasionál mak hatene,” afirma PM Taur ba jornalista, Kinta (07/11/19) hafoin PM enkontru semanál ho Prezidente Repúblika iha Palásiu Prezidensiál, Bairru-pite, Kinta (07/11/19).

Antes ne'e, bainhira halo audiénsia ho Ministra Finansas, Segunda (04/11/19) iha Parlamentu Nasionál, Deputada Virginia Ana Belo husi Bankada CNRT, ameasa sei vota kontra ba Orsamentu Jerál Estadu (OJE) 2020, bainhira livru Panorama Orsamentál 2020  la tuir estrutura no aumenta laiha balansu.

Lee Notisia Relevante: Deputada CNRT Ameasa Vota Kontra OJE 2020

Xefi Governu hatete, nia sei la foti ba kestaun kona-ba ida ne'e. Tanba, nia dehan, ida ne'e kompetensia Parlamentu Nasionál nian.

PM reafirma, hanesan mós Prezidente Repúblika nia kompetensia mak hodi promulga ou lae. Ho nune'e, ida-idak iha nia kompetensia hodi organiza.

"Prezidente mak promulga ne'ebé organiza ne'e ida-idak nian no ami nian mak aprezenta de'it," tenik PM Taur.

Page 1 of 2

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com