Items filtered by date: Sunday, 13 September 2020

Sunday, 13 September 2020 15:44

MP Husu PN atualiza Lei Droga

Tempotimor (Dili) - Timor-Leste daudaun ne'e sai fatin tránzitu ba droga, nune'e iha balun konsege kaptura no prosesu la’o hela hanesan kazu kontentor sia matéria bázika produsaun droga.

Prokuradór Jerál Repúblika, José Ximenes hateten, Timor-Leste frajil tebes iha lei atu kontrola ba matéria báziku droga nian, kazu kontentor sira ne'ebé prende husi ekipa konjuntu PNTL, Alfándega no Ministériu Públiku iha 2018 sai referénsia ba implementasaun Lei Droga ne'ebé PN produs iha 2017.

Nia esplika, bainhira arguidu sira halo julgamentu, tribunál absolve ka fó livre ba arguidu sira tanba Lei Droga la subliña matéria bázika atu produs ba droga.

"Ita iha frajilidade legál, pontu-de-vista haree lei númeru 2/2017 sasán sira ne'e des-atualiza iha aneksu A to’o C, tanba ne'e duni mak momentu ne'ebá ha’u husu ba Parlamentu Nasionál para anualmente atualiza matéria báziku sira ne'e," dehan José, bainhira partisipa iha distribuisaun matéria báziku droga, iha Kuartél Jerál PNTL, Kaikoli, Kinta (10/9).

José akresenta, bainhira Lei númeru 2/2017 mak la atualiza Timor-Leste la’ós de’it sai fatin tránzitu ba iha droga, maibé mós sai fatin ba tránzitu matéria báziku droga nian no bele mós materiál báziku ba iha kímiku seluk hanesan bomba. (*)

Published in Justisa

TempoTimor (Díli)- Sekretáriu Estadu Kooperativa (SEKoop), ohin (11/09), hahú hala'o enkontru ho juventude suku Metiaut, hodi halo koordenasaun, oinsá dezenvolve kooperativa turízmu, iha suku Metiaut.


Sekretáriu Estádu Kooperativa (SEKoop), Elizário Ferreira hatete, objetivu husi vizita ne'e, atu koordena ho juventude sira, iha suku Metiaut, hodi rona sira-nia opiniaun, oinsá dezenvolve kooperativa, iha sira-nia suku laran.


Nia hatete, juventude suku Metiaut hela besik liu, iha área kosteira (tasi-ibun), no bainhira joven sira harii kooperativa, iha suku refere, sira bele hetan benefísiu barak.


"Hakarak dehan katak, ba oin ne'e imi joven sira bele harii kooperativa, bele aproveita benefísiu lubuk ida, iha ne'ebá, imi nia seguransa iha Cristo Rei imi bele aproveita, ema ne'ebé ba vizita, imi bele halo kobransa, hodi oinsá bele hetan osan", dehan SEKoop, Elizário Ferreira ba juventude sira, iha suku Metiaut, Postu-Administrativu Cristo Rei, Munisípiu Díli, Sexta (11/09).


Governante ne'e akresenta, nia prefere atu juventude sira harii kooperativa turízmu, tanba bele hetan benefísiu husi sira nia talentu rasik.


Tuir Elizário, suku Metiaut iha poténsia ne'ebé boot, tanba hela besik tasi, inklui sítiu turístiku relijiózu Cristo Rei.


"Imi Konta netik istória ruma, kona-bá Cristo Rei, produz netik buat ruma, atu ema ne'ebé vizita bele sosa, hanesan kamizola ka produtu ruma", dehan nia.


Governante ne'e fó hanoin katak, dalan ida atu dezenvolve mak tenke harii kooperativa, liuhosi turìzmu iha tasi-ibun, tanba iha poténsia boot no kooperativa sai hanesan asosiasaun ida ba ema, hodi halibur aspirasaun ema hotu nian.


"Joven sira bele organiza malu homan katupa, hodi fa'an ba ema vizitante sira, iha Cristo Rei, aban bain-rua sé ita bele tau matan, oinsá mak bele fa'an produtu ruma, iha área ne'ebá", nia fó hanoin.


Xefe suku Metiaut, Júlio da Costa Xavier, husu ba joven sira, atu nafatin esforsu-aan, hodi servisu hamutuk harii kooperativa, iha suku laran.


"Buat ne'ebé imi promete, dehan atu halo, imi tenke esforsu, atu nune'e ita bele hetan konfiansa husi Governu, no ami parte autoridade prontu atu ajuda", dehan nia.

Published in Ekonomia
Sunday, 13 September 2020 15:24

Administradór Manatutu Prontu Husik Kargu

Tempotimor (Manatutu) - Bainhira mandatu remata iha tinan lima nia-laran, Administradór Munisípiu Manatutu, Fernando Sousa prontu entrega fali responsabilidade ba ema seluk no kompromete sei la kompete tan iha períodu tuir mai.

Nia hateten, kuandu husi Ministériu Administrasaun Estatál (MAE) hasai ona desizaun atu troka fali ema foun, nu'udár Manatutu-oan prontu koopera no agradese, tanba bele hetan konfiansa durante mandatu.

"Mai iha Manatutu nian to'o tempu atu troka, tenke troka, ha'u mós agradese bainhira to'o tempu troka, tanba bele fó fiar mai ha'u", dehan Administradór Fernando, ba www.tempotimor.com, iha nia knaar fatin Manatutu, Tersa (08/09).

Iha rekrutamentu ba administradór nian, nia mós kompromete sei la kompete tan iha períodu tuir mai, tanba hakarak fó oportunidade ba maluk sira seluk.

"Ha'u sei la kompete tan, tanba ema Manatutu la'ós ha'u mesak de'it, tinan lima ona ha’u espera Manatutu-oan ida atu mane ka feto bele mai troka", tenik nia.

Nia mós sujere, bainhira mandatu hotu ema ne'ebé atu asume fali responsabilidade hanesan Administradór Munisípiu Manatutu di'ak liu feto atu haburas igualdade jéneru iha Timor-leste.

"Tuir loloos pelopor loloos ne'e ami Manatutu mak ami nia biin ida naran Rosa Muqui Bonaparte mak funda buat ida OPMT, ha’u sente orgullu tebes se loron ida ami-nia administradór Manatutu ne'e feto ida", nia akresenta.

Entretantu, MAE hahú ona halo rekrutamentu ba Prezidente Autoridade Munisipál no Administradór Munisípiu iha Baukau, Lautem, Vikeke, Kovalima, Ainaru no Aileu, maibé to'o agora Munisípiu Manatutu seidauk iha  avizu ruma. (*)

Published in Manatuto

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« September 2020 »
Mon Tue Wed Thu Fri Sat Sun
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30        

Tempo Timor Networks