Items filtered by date: Friday, 11 September 2020

Tempotimor (Dili) - Diretora Jerál Prestasaun Saúde, Ministériu Saúde, Odete da Silva Viegas hateten, bebé ne'ebé mate beibeik iha ospitál Nasionál Guido Valadares (HNGV) ne'e mai husi fatór oioin.

Tuir nia, kazu bebé mate dalaruma tanba inan sira ladún kuidadu no fó atensaun ba kondisaun bebé nian durante sei iha isin.

"Bebe ne'ebé mai mate iha ospitál, ita mós tenke haree husi fator oioin, tanba serake inan sira durante isin rua halo kontrolu regulár husi fulan ida to'o fulan sia, depois iha momentu sira hanesan ne'e, sira mos iha nutrisaun di'ak ba sira-nia aan ka lae, no mós alimentasaun ba bebé, tanba moras balun mós labarik mate tiha iha kabun", dehan Odete, hafoin halo lansamentu instalasaun ekipamentu jinastika, iha Largo Lesidere, Sesta (11/09).

Dotora ne'e akresenta, evita bebé mate beibeik mak inan sira isin rua tenke ba konsulta, nune'e bele hatene mudansa dezenvolve bebé nian.

"La'ós ema hotu-hotu ba iha ospitál mate tanba atendimentu la di'ak, maibé iha fator balun ne'ebé presiza haree", nia esplika.

Entertantu, ho kazu hirak ne'e, Ministériu Saúde (MS) sei hadi'a etika profesionalizmu iha Hospital.

"Ita buka loron ba loron atu hadi'a liután étika profisionál ba ema ida-idak, maibé buat hirak ne'e la'o hodi tempu atu bele hadi'a", dehan Odete.

Nune'e, espera Hospital nafatin iha planu hodi hasa'e konxiensia ba ema atu bele atende di'ak ba pasiente, tanba relasiona ho ema-nia moris sensetivu uitoan, tan ne'e nafatin buka meiu hasa'e koñesimentu ema nian atu sai responsablidade ba servisu tomak. (*)  

Published in Saude

Tempotimor (Dili) - Hafoin reuniaun entre Ministra Solidaridade Sosiál no Inkluzaun (MSSI) ho Ministru Ensinu Superiór no Siénsia Kultura foti ona konkluzaun katak estudante sira kontinua selu propinas nafatin.

Ministru Ensinu Superiór no Siénsia Kultura, Longuinhos dos Santos hateten, estudante timoroan iha devér atu selu propinas tanba bazeia ba apresentasaun ne'ebé MSSI halo katak subsídiu US$ 200 ba kada família ne'e 45% benefísiu ba estudante sira.

Tuir nia, iha rai-laran Governu fó ona subsídiu hanesan US$ 200 kada uma kain ne'e hanesan meui ida ne'ebé atu tulun timoroan sira.

"Devér estudante nian atu estuda. Devér estudante nian atu bele selu propinas. Diretu estudante nian atu bele hetan siénsia ne'ebé kualidade no atu bele hetan siénsia ne'ebé efetivu iha durasaun prezensa iha sira-nia aula ne'e rasik", dehan Ministru Longuinhos, iha edifísiu MSSI, Kaikoli, Sesta (11/09).

Nia dehan, iha rai-laran Governu fo ona subsídiu hanesan 200$ kada uma kain ne'e hanesan meiu ida ne'ebé atu tulun timoroan sira.

Nia esplika, subsídiu ba uma kain US$ 200, subsídiu ba eletrisidade no subsídiu ba traballadór sira mak 60%. Siginfika katak 45% husi ida ne'e benefisia mós ba estudante sira.
Ne'e duni, Governu konsidera ne'e nu'udar atuasaun ne'ebé halo ba estudante timoroan sira iha rai-laran.

"Governu tenke fó subsídiu ba timoroan iha rai-li'ur nia objetivu prinsipál maka limita timoroan iha rai-li'ur labele mai Timor tanba  moras Covid-19", dehan Longuinhos.

Nia hateten, subsidiu la'ós ba estudante de'it, maibé enjeral timoroan iha estranjeiru tuir Dekretu nu.21/2020 katak promove no asegura sidadaun Timor sira iha rai-li'ur.

Nia hatutan, estudante sira ne'ebé ensinu superior públiku lei preve iha ne'ebá, liuliu iha institutu UNTL ninian maka Governu iha kompeténsia atu define valór propinas iha rekizitu ne'ebé iha.

Nune'e, ba universidade privadu sira, Governu laiha kompentensia atu define valór propinas ne'e. Governu iha kompentensia fiskaliza de'it, valór propinas ne'e fundasaun husi universidade maka define atu hasa'e ka hatun. (*)  

Published in Edukasaun & Kultura
Saturday, 12 September 2020 00:41

SEKoop sei Koopera Ho UNTL kria kooperativa

Tempotimor (Dili) - Sekretaria Estadu kooperativa (SEKoop), halo vizita traballu ba Universidade Nasionál Timor Lorosa'e (UNTL) hodi ko'alia kona-ba planu kria kooperativa ba universidade.

"Atu kria kooperativa ba universidade sira hodi asegura bem estar ba dosente, funsionáriu administrasaun universidade nian, inklui estudante, atu asegura sira nia bem estar família nian, sustentabilidade finanseira nian, no mós kontribui ba dezenvolvimentu ekonomia, liuliu área finanseira iha ita-nia rai-laran," dehan Sekretáriu Estadu,Elizário Ferreira, hafoin hasoru malu ho Reitór UNTL, iha Kampus, UNTL, Sesta (11/09).

Nia hatutan, liuhusi soru-mutu ne'e atu halo kooperasaun hodi servisu hamutuk, atu aselera reuniaun no diseminasaun informasaun ba funsionáriu, dosente, no estudante, atu hatene di'ak liu oinsá lala'ok kooperativa nian, nune'e bele asegura servisu kooperativa ba oin la'o di'ak liután.

Iha fatin hanesan, Reitór UNTL, Francisco Miguel Martins hateten, UNTL hanoin ona  atu halo kooperasaun tanba Estadu asegura no garante ho lei, tan ne'e sei la iha kestionamentu ba kooperativa ne'e.

"Ita-nia Estadu mós asegura no garante ho lei, sei laiha kestionamentu atu partisipa kooperativa ne’e", dehan nia.

Ne’e duni, sei hein sekretáriu estadu fó fali informasaun jerál kona-ba kooperativa, depois iha ona entendementu mak foin organiza oinsá fó fazeadamente, no formasaun ba membru sira.

"Oinsá atu hala'o kooperativa ne'e ho didi’ak no ho loloos iha ita-nia grupu nia laran, entaun formasaun ne'e nu'udar matéria ka instrumentu ida atu ema koñese didi'ak mekanizmu oinsá, lala'ok oinsá, implementa oinsá, atu bele normaliza, funsionamentu ne'e ba oin" dehan Reitór.

Nia haforsa, ba primeira etapa sekretaria estadu sei halo palestra, no universidade sei organiza semináriu ida ba sivista akadémika tomak, hafoin fó formasaun ba membru sira para asegura kooperativa ne'e.

Hotu tiha maka sira ba rejistu formalmente tuir lei ne'ebé iha atu bele hetan rekoñesimentu no funsionamentu formál  iha universidade nia-laran. (*) 

Published in Ekonomia
Page 1 of 3

.