Tempo Timor

Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

 Kay Rala Xanana Gusmão hamutuk ho Mari Alkatiri iha momentu kampaña konjuntu ba eleisaun prezidensial iha Gleno, Ermera 2017. Foto Valentino Dariel Sousa. 
DILI  – Sekretariu jeral partidu FRETILIN atual primeiru – ministru governu minoritáriu Mari Alkatiri halo alegasaun katak iha “ema balun” koko ona atu lori nia ho Kay Rala Xanana Gusmão tama iha konfrontasaun.

Alkatiri hatutan, dalaruma Xanana sei halo konfrontasaun ho nia, tanba lakohi atu entrega relatóriu kona – bá negosiasaun fronteira maritima entre Timor – Leste ho Austrália ne’ebé asina ona iha kuartel jeral Organizasaun Nasões Unidas (ONU) iha loron 6 Marsu liubá, maibé Alkatiri mós rekoñese katak, ministru Agio Pereira aprezenta ona relatóriu ba governu. 

“Ha’u hatene sasan balun no iha informasaun, balun tenta atu loke konfrontasaun entre Xanana mai ha’u. Sira nia objetivu nune’e, ami nain rua atu konfrontasi,” hatete Alkatiri iha Ai – Mutin, Dili foin lalais. 

Liga ba kestaun ne’e, antes ne’e lideransa Forsa Armada Timor – Leste nian inklui lider partidu balun dun katak, jerasaun foun sira mak koko atu hafahe lider historiku sira iha situasa un politika atual. 

“Ha’u hanoin deklarasaun ne’ebé dehan jerasaun foun mak atu fahe lideransa tuan sira ne’e erradu (sala boot) no mehi sala. Se hanesan ne’e entaun jerasaun tuan sira dependênsia ba jerasaun foun,” hatete estudante universitariu, Agusto M.D.C Freitas. 

Estudante iha fakuldade ekonómia ne’e mós lamenta ho hahalok lider balun ne’ebé sempre update status provokativu iha media sosial (Facebook) hodi so’e lia (piadas) no insulta lider historiku seluk. 

“Ha’u akompaña iha Facebook katak boot partidu ida mak durante ne’e badinas loos halo piadas ka insulta lider seluk,” hatutan Agusto.

Iha loron 17 Marsu liubá iha Vila Verde, Alkatiri mós lamenta tebes ba prezensa Kay Xanana Gusmão nian ne’ebé momentu fila hosi rai liur, tuir loloos labele ba direitamente sede konjuntu Aliansa Mudansa ba Progresu (AMP), maibé tenke ba iha palásiu governu hodi relata relatóriu kona – bá prosesu negósiasaun no asinatura ba fronteira maritima entre Timor – Leste ho Austrália. 

Maibé antes ne’e, Xefe Negosiador prinsipal ba negosiasaun fronteira maritima, Kay Rala Xanana Gusmão hatete, sei la aprezenta relatóriu ba governu, tanba nia la’ós ba reprezenta governu, no mós la’ós nu’udar membru governu. 

Xanana hatutan, rajaun sei la aprezenta relatóriu ba governu kona – ba prosesu negósiasaun fronteira tasi nian entre Timor – Leste ho Austrália, tanba nia ba la’ós reprezenta governu. 

“Ha’u la’ós membru governu. Iha ajente governu nian mak reprezenta governu iha ne’eba mak adjuntu primeiru – ministru ba delimitasaun fronteira maritima Agio Pereira,” hatete Xanana iha sede Aliansa Mudansa ba Progresu (AMP), Bairo Grilo – Dili, Sesta (16/03).

Nia hatutan, sei laiha ema ida inklui primeiru – ministru atu husu nia kona – bá relatóriu ne’e. Tenke husu ba reprezentante governu,” esplika Xanana.

“Ha’u ba halo serbisu la’ós buka asinatura, maibé ba atu manan,” deklara Xanana ho lian nakdedar.

Xanana mós so’e lia katak nia lahatene saida mak governu sestasaun (jestaun) ne’ebé lidera hosi primeiru – ministru Mari Alkatiri.

“Ha’u mai to’o Dili labarik sira husu ha’u atu esplika governu jestasaun (jestaun), ha’u mós lahatene ida. Sira dehan avo Nana ami lahatene saida mak governu jestasaun,” hatete Xanana.

Xanana hatutan, to’o oras ne’e mós nia lahatene governu ne’e iha ne’ebé.

“Lahatene governu iha ne’ebé mak ne’e, ha’u mós lahatene ida,” hatutan Xanana. (Oki)   

Comment

Kabu Submarinu 

DILI – Empreza Moratelindo promete sei investe osan hamutuk millaun U$20 hodi dada kabu submarinu mai Timor – Leste.

Diretor Teknolojia PT. Mora Telematika Indonezia (Moratelindo), Michael McPhail katak, investimentu ne’e sei iha impaktu positivu ba governu, edukasaun no bisnis.

Comment

DILI – Serbisu Investigasaun Kriminal (SIK) hala’o ona prosesu investigasaun ba inisiál RLV kona – bá nia komentariu sira ba kazu veteranu “ilgal” sira ne’ebé antes ne’e polisia ka’er iha Lahane, Dili no mós kona – bá planu governu nian atu halo eviksaun ba sidadaun sira ne’ebé durante ne’e okupa hela rai Estadu iha Dili.

RLV hatete, nia prezensa iha edifisiu SIK Dili, tanba hetan kontaktu hosi SIK rasik hodi husu informasaun balun kona – bá nia posting (hakerek) sira iha Facebook (Social Media) durante ne’e.

Laka hatutan, hafoin hetan kontaktu hosi parte SIK, nia voluntariumente ba presta deklarasaun iha SIK durante horas tolu nia laran.

"Ha’u mai iha ne’e atu kolabora prosesu kona – bá atividade balun iha media sosial, tanba sira dehan ami insulta ema boot de’it, tanba ne’e mak ohin ha’u mai klarifika iha ne’e," hateteRLV ba Tempo Timor iha kuartel jeral Polisia Nasionál Timor – Leste (PNTL), Segunda (19/03).  

Nia hatutan, nia komentariu iha media sosial bazeia ba notisia TVTL nian ne’ebé fó sai kona – bá kazu veteranu sira ne’ebé polisia ka’er sira iha Lahane iha tempu hirak liubá.

“Polisia sira husu ha’u dehan informasaun sira ne’ebé ha’u posting iha Facebook ne’e loos ka la’e, ha’u dehan ne’e loos, tanba bazeia ba notisia hosi TVTL nian, no ha’u nunka uja ID falsu, no mós lakohi atu tolok ita nia lider sira,” esplika RLV.  

RLV mós kestiona katak tebes ka la’e ema hamutuk 7000 falsifika do kumentu veteranu ne’ebé hetan orientasaun hosi Somotxo no David Dias Ximenes ‘Mandati’.

“Tanba ida ne’e kria komplikasaun iha públiku, entaun ami tenke tau ida ne’e para bele iha prosesu ida ne’ebé efetivu para labele hamoe veteranu sira nia instituisaun,” esplika RLV.

“Tanba ne’e mak ami tau iha ami nia status ne’e hanesan espresaun pessoal ba públiku”.

Nia hatutan, kona – bá nia komentariu ba planu governu nian atu halo eviksaun, tuir RLV katak ne’e labele duni, tanba bele kria injustisa sosial.

Entretantu, tuir informasaun ne’ebé Tempo Timor asesu katak, polisia SIK mós hala’o ona prosesu investigasaun ba ema ida ho naran inisiá AT, no polisia ba tula ho kareta sedang ida hosi nia serbisu fatin ba edifisiu SIK iha kuartel jeral PNTL, Kaikoli – Dili. Entretantu,RLV hafoin hetan kontaktu, nia voluntariumente ba de’it ho nia motor. AT presta deklarasaun iha sesaun dadersan, no RLV presta deklarasaun iha sesaun lorokraik ne’ebé hahu hosi horas tuku ida to’o tuku ha’at lorokraik.

Polisia mós sei kontinua bolu tan sidadaun balun ne'ebé identifikadu ona, no oras ne'e sei kontinua elabora informasaun sira ne'e hodi buka tuir no hatene loloos nia hun no abut. (Oki)

Comment

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com