Tempotimor (Dili) – Prezidente Parlamentu Nasionál (PPN) Arão Noé de Jesus da Costa Amarál konsidera, akontesimentu ema sivíl ho motor ne'ebé bele tama iha área kampu aviasaun Internasionál Nicolau Lobato, nuudar problema boot ba Timor-Leste.

“Akontesimentu ne'e fó duvidas boot ba estranjeiru sira atu mai vizita Timor-Leste,” PPN hatete iha Parlamentu Nasionál, Tersa (15/10/19).

Nia dehan, loloos akontesimentu ne'e, labele akontese. Tanba, nia impaktu boot ba ema atus resin ne'ebé iha hela aviaun laran.

"Asuntu la'ós atu investiga dei't suspeitu. Maibé, investiga mós ema ida fó autorizasaun bele tama iha fatin ne'ebá. No tama husi ne'ebé?" PPN ne'e afirma.

Arão husu ba Ministru Interiór para bele fó atensaun no investiga seguransa sira iha aeroportu. Tanba saida mak husik joven ne'e, tama to'o iha área ne'ebé loloos nia labele tama no perigozu.

"Akontesimentu ne'e sai problema boot ba nasaun Timor-Leste. Satán ita nia kampu aviasaun ne'e internasionál.  La'ós aviaun iha timor dei't mak semo iha ne'ebá," esplika Arão.

Ba relasaun internasionál, tuir PPN, akontesimentu ne'e grave tebes. Tanba, halo ona duvidas boot  ba estranjeiru atu tama mai Timor-Leste, bainhira iha situasaun sira hanesan ne'e.

PPN ne'e subliña, tenke foti sansaun ba joven ne'ebe tama ba kampu aviazaun no investiga seguransa iha fatin ne'ebá. Nia dehan, seguransa sira tenke responsabiliza para iha future, labele akontese tan.

"Ba jestaun sira iha aeroportu, responsabiliza ba akontesimentu ne'e. Frakeza iha liña seguransa nian entaun presiza haforsa. Se lae duvidas ba estranjeiru sira atu mai vizita nasaun Timor-Leste," tenik PPN.

Tempotimor (Dili) – Ministru Reforma Lejislativa Asuntu Parlamentar (MRLAP), Fidelis Manuel Leite Magalhães hatete, lei fó dalan ba opozisaun iha Parlamentu Nasionál (PN) atu vota a favor ka kontra ba OJE 2020.

"Ne'e demokrásia. Vota a favór ka kontra konforme. Maibé, dezenvolvimentu la'o nafatin. Governu mai ho orsamentu, mai diskusaun no debate. Tanba, Governu tenke kumpri nia dever hanesan ezekutivu, para atu lori dezenvolvimentu," dehan Fidelis iha PN, Tersa (15/10/19).

Governu, iha Tersa loraik sei aprezenta Orsamentu Jerál Estadu (OJE) tinan 2020, ba Parlamentu Nasionál (PN). Ba tinan 2020, Governu sei deskute no debate orsamentu hamutuk billiaun $1.95 ho PN para hetan aprovasaun.

"Agora, orsamentu ne'e mak opozisaun diskorda, ne'e direitu opozisaun nian. Ha'u husi Governu laiha komentáriu ruma. Atu konkorda ka la konkorda ne'e la'ós kestaun. Tanba, ha'u nia opiniaun ba asunte ne'e la importante. Tanba ne'e, pozisaun polítika bankada nian," nia afirma.

Governante ne'e hatutan, antes ne'e Bankada Demokrátika iha PN deklara katak sei vota kontra ba OJE 2020. "Bankada opozisaun liuliu Bankada Demokrátika proklama tiha ona atu vota kontra. Se sira hola pozisaun ida ne'e. Sira nia direitu tomak. Konstituisaun mak fó dalan," Fidelis dehan.

Tempotimor (Dili) – Ministru Negósiu Estranjeiru no Kooperasaun (MNEK), Deonisio Babo Soares hatete, agora daudaun ne'e iha timoroan na'in 60 ne'ebé kontinua hela sira-nia estudu iha Kuba.

“Kuba nu'udar nasaun aliadu ba Timor-Leste, iha sira-nia komprimisiu hori uluk to'o agora, atu forma timoroan sai mediku hamutuk 1000 pesoas. Daudaun ne'e, iha ema 60 mak halo hela sira-nia estudu iha Kuba. Na'in 17 estuda iha área espesialista mediku no balun iha área matemátika no siensias,” informa Babo iha Palásiu Governu bainhira remata enkontru ho Primeiru Ministru, Segunda (14/10/19). 

Tuir Babo, ninia sorumutu ho PM Taur mós atu relata rezultadu enkontru ne'ebé foin lalais nia partisipa iha Asemblea Jerál Nasoins Unidas.

"Iha pontus importante lubuk ida, ne'ebé ko'alia iha reuniaun Nasoins Unidas nian. Ko'alia ba dahuluk nian mak kestaun klimatika, dezenvolvimentu sustentável, asuntu jeneru nomós atividades relasiona ho ekonomia mundiál ne'ebe hala'o iha asembleia nasoins unidas nian," Babo esplika.

Nia subliña, intervensaun husi nasaun Timor-Leste nian iha asembleia jerál nasoins unidas foka liu ba mudansa klimatiku, emisaun de karbonu ou polusaun.  Tanba, tuir MNEK, bele ajuda nasaun ki'ik sira ne'ebé  envolve.

"Problema ne'ebé mosu iha Azia Pasifiku mak kestaun tasi sa'e no udan boot maka'as liu fó impaktu ba seguransa alimentar," nia esplika.

Nia afirma, relasiona ho problema hirak ne'e, Timor-Leste la'o hamutuk ho nasaun ki'ik sira iha mundu, tenta atu mobiliza para bele apoiu liuhosi nasaun boot sira, hodi sobrevive iha tempu naruk.