“Ami-nia problema ida mós kona-ba Ministériu Agrikultura no Peskas (MAP), se possível apoiu tán tratór boot ka tratór ki’ik, tanba traktór ne'ebé rai hela, laiha orsamentu atu halo manutensaun”, dehan nia liuhusi intervensaun diálogu ho PR Lú Olo iha Jinajiu l Maliana, kuarta (15/12).
Hatan ba preokupasaun ne'e, Sekretariu Estadu Kooperativa (SEKOOP), Elizário Ferreira hatete, Kooperativa lakohi fahe traktór, tanba iha 2022 sei iha projetu pilotu ida ba grupu 130 iha territóriu no kada munisípiu ida sei konsentra sentru formasaun 2 iha parte leste ida, oeste ida ba sentru formasuan atu sosa karau hamutuk 260 tau konsentra iha ne'ebá ema fó treinu karau ne'e atu fila natar ho karau.
"Tanba komparasaun karau hemu de'it bee la hemu gazoel, manutensaun karau kuandu nia servisu kolen lori ba ai-mahon, maibé traktór at presiza besi osan atu hola, traktór at la han, maibé karau mate bele han", esplika nia.
Tanba ne'e, SEKOOP halo analiza, komparasaun sira ne'e ba futuru Kooperativa sira sei hetan fasilidade ida ne'e, maibé sira mós sei kontribui ba Estadu oinsá atu asegura sustentabilidade finanseiru Estadu nian.
Enkuantu Vise Ministru Agrikultura no Peskas (MAP), Abílio Xavier de Araújo hatete, preokupasaun iha Atabae iha hela eskavatór balun ne'ebé ministériu dezloka hela iha ne'ebá.
“Ha'u hanoin ita iha hela eskavatór balun ne'ebé ministériu dezloka hela iha ne'ebá, atu halo antesipasaun iha tempu udan bainhira rai henek ka bee sobu irrigasaun sira, ministériu orienta hela tékniku balun atu akompaña hodi ajuda hela toos na’in sira hasoru situasaun udan”, informa nia. (*)