Print this page

Mota Bebai Estraga Natar Ektare 200 Resin iha Purugua

Hare ne'ebe be hoban hela iha natar laran, Segunda (4/4) Hare ne'ebe be hoban hela iha natar laran, Segunda (4/4) Foto Tempo Timor

Tempotimor (Bobonaru) - Udan boot ne’ebé akontese iha Timor laran durante loron rua halo Mota Bebai sae hodi estraga komunidade nia natar kuaze 200-resin iha Suku Purugua, Postu Administrativu Kailaku, Munisípiu Bobonaro.

Husi udan no anin boot ne’e, konsege estraga komunidade sira-nia natar ne’ebé atu kolleta ona besik ektare 200 resin.

Ho situasaun ne’e, vítima Mateus Leto Mau, triste tebes tanba hare ne’ebé kolleta ona no balun besik kolleta hetan estragu totál.

“Ami lakon boot, tanba ami moris vida agrikultór depende ba aihan ne’e, mais mota estraga ona, hare balun ko’a ona no futu rai hela iha natar laran, balun sei isin hela, mais estraga hotu ona, ami tinan ne’e hamlaha ona tanba foin kolleta no balun seidauk maibé mota estraga hotu, nune’e ami husu ba parte kompetente ajuda netik ami iha suku Purugua, tanba komunidade suku Purugua tomak mak lakon ho aihan ne’ebe mota Bebai estraga”, dehan Mateus ho mataben ba www.tempotimor.com iha natar Tapogua, Domingu (04/04).

Maske, balun ne’ebé seidauk ko’a no futu ne’e sei di’ak, maibé sira barak mak ko’a no futu ona nomós balun tau hela iha saku, mais bee estraga hotu no sente lakon boot no triste tebes haree hanesan ne’e.

Reperezentante autoridade suku Purugua, Cornelio António hatete, udan ne’e akontese deste horkalan oras 00:00 too fali 13:00 lokraik ne’e mak hodi estraga komunidade sira-nia hare no balun bee lori hotu ba mota.

“Hanesan pesoál postu suku Purugua nomós hanesan natar na’in triste boot tanba ba bee estraga ai-han hanesan ne’e, tanba lakon osan lubuk hahí husi fila rai mai to’o agora”, dehan Cornelio.

Iha situasaun ne’e, komunidade barak lakon ai-han hanesan hare nomós lakon ba serbisu, osan no tempu barak mak sira soe ba natar loron kalan hein animal tama, ikus mai rezultadu mak mota Bebai ne’ebé maka’as tama ka bosu estraga hahán ne’e sai aat hotu.

Entretantu observasaun jornalista www.tempotimor.com iha terenu nota katak, kuaze natar ektare 200-resin mak estragu no komunidade sira salva hare maibé rezultadu ladi’ak ona, korente bee ne’e tama hotu natar laran no lori hotu ba mota. (*)

Rate this item
(0 votes)
Last modified on Monday, 05 April 2021 11:26
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com