Prezidente Autoridade Munisípiu Bobonaru, Jeferino Soares do Santos hatete, autoriedade munisípiu Bobonaru hala’o ona sorumutu hodi diskute kona-ba planu sira ne’ebé atu tau iha Orsamentu Jerál Estadu 2022.

“Ita hatene orsamentu 2022 nia tama iha planu preparasaun nian hahú husi aldeia, suku, postu to’o munisípiu, mais agora aprezenta iha munisípiu tuir kalendáriu iha fulan-maiu nia laran ne’e no ikus liu iha fulan-jullu planu ne’e sei halo diskusaun iha Ministériu Administrasaun Estatál (MAE)”, dehan Jeferino ba www.tempotimor.com iha nia fatin, kinta (25/03).

Prezidente ne’e mós dehan, sorumutu ne’e aprezenta ona matadalan ba serbisu Munisipal nian atu la’o tuir planu saida mak halo iha tinan 2022 nian.

“Tanba iha buat foun balun ne’ebé agora aumenta, entaun tenke tau iha planu kona-ba kapitál dezemvolvimentu nian, tanba prioridade sira ami halo iha tinan 2016 to’o agora seidauk hetan aprovasaun husi governu sentrál, tanba ne’e ita hein katak ho planu ida ne’e ita bele identifika fali planu ne’ebé seidauk aprova no fatin seluk seidauk halo. Maibé ita tau nafatin prioridade atu nune’e bele haree iha futuru,” afirma nia

Ba planu sira ne’e parte munisípiu tau iha programa, maibé to’o iha nivél nasionál mak sei deside, tanba iha esperiénsia iha orsamentu jerál tinan 2021 nian, munisípiu Bobonaru propoin millaun US$21, maibé to’o iha nasionál redúz to’o millaun US$5 de’it.

“Ita bele propoin orsamentu boot, maibé iha nasionál mak sei deside, hanesan iha tinan ne’e (2021) nian ami propoin orsamentu millaun US$21 hare ba planu maibé situasaun polítika redús tuun to’o millaun US$5. Entaun orsamentu ba 2022 ita seidauk iha valór fixu, maibé planu no programa sira iha hotu oa mak foin hatene, orsamentu hira mak atu aprezenta iha 2022 liuliu planu sira hanesan halo uma, harii no reabilita eskola inklui edifísiu sira seluk,” katak nia.

Planu prioridade ne’ebé munisípiu Bobonanru tau atensaun liu mak agrikultura, saúde, edukasaun no infraestrutura báziku sira. No planu prioridade sira tau hamutuk hodi, oinsá lori ba nasionál.(*)