Haree ba númeru kazu ne’ebé kontinua aumenta iha Timor-Leste mak Ministériu Saúde (MS) hahú implementa ona advokásia ba autoriedade lokál no pesoál saúde sira iha munisípiu hodi korajen ba komunidade sira oinsá bele simu vasina.
Ba kestaun ne’e doutór, Noel Gama Soares husi Ministériu Saúde (MS) hatete, MS servisu hamutuk ho Saúde Munisípiu Bobonaru (SMB) hodi fó formasaun ba pesoál saúde sira kona-ba vasinasaun nian ne’ebé sei hala’o iha tempu badak, liu-iu munisípiu sira ne’ebé iha fronteira rai.
“Ohin ami halo advokásia ba autoridade lokál no lidér komunitária sira iha postú administrativu Maliana atu nune’e sira bele hatene kle’an kona-ba vasinasaun ne’ebé sei mai iha tempu badak. Inklui sira bele hatene loloos tanba sá governu implementa vasina iha ita-nia rai. Entaun autoriedade lokál sira presiza hatene para ajuda MS hodi mobliza komunidade sira partisipa iha vasina kuandu ita implenta ona”, dehan Noel ba www.tempotimor.com iha salaun Saúde Munisípiu Bobonaru, kinta (25/03).
Vasina AstraZeneca ne’ebé atu uza iha Timor-Leste ne’e mosu issu oioin ne’ebé halo ema dúvida, maibé nu’udar profesionál saúde tenke fahe informasaun ho loloos tuir saida mak ema halo tiha relasaun ho vasina ne’e rasik.
Fó mós korajen ba komunidade sira katak, tenke kompriende tuir saida mak profesionál saúde sira ne’ebé alerta dadaun ona, tanba ne’e loos no kredivél.
Xefe Suku Holsa, António Santa Crus dehan, populasaun sira ne’ebé hela iha fronteira tenke vasina tanba besik liuba nasaun viziñu Indonézia.
“Ba postu ne’ebé aban bainrua ita atu halo vasina ne’e, se bele ita labele konsentra hamutuk iha Ospitál Referál ka Sentru saúde, maibé hanesan autoridade ami prefere karik tau mós iha sede suku para hafasíl ba komunidade atu asesu vasina refere, nomós komunidade ne’ebé hela dook husi sede suku tenke tau mós fatin vasina besik iha fatin ne’ebé sira hela ba,” dehan nia.
Iha advokasia ne’e importante atu informasaun ne’ebé di’ak atu nune’e komunidade hotu bele kompriende hodi asesu ba vasina kuandu to’o ona Timor-Leste no implementa ona. (*).
