Oknum PNTL Uza Arma Tiru Komunidade Nia Karau

Komunidade suku Lahomea halo hela pers konferénsia iha sede suku Lahomea kona-ba oknum PNTL ne'ebé tiru kom komunidade sira-nia karau. Segunda (22/3). Komunidade suku Lahomea halo hela pers konferénsia iha sede suku Lahomea kona-ba oknum PNTL ne'ebé tiru kom komunidade sira-nia karau. Segunda (22/3). Foto Tempo Timor

Tempotimor (Bobonaro) - Oknum membru Polísia Nasionál Timor-Leste (PNTL) ho inisiál MDS uza arma Estadu nian hodi tiru estraga komunidade nia karau iha Suku Lahomea, Postu Administrativu Maliana, Munisípiu Bobonaro.

Bazeia ba atu oknum PNTL ne’e mak komunidade suku Lahomea liuhusi konferénsia imprensa hatete, komunidade suku Lahomea kontra atitude pesoál MDS husi eskuadra postu Maliana uza arma hodi tiru komunidade nia karau iha loron 19 fulan-marsu tinan 2021.

“Ami-nia labarik na’in-rua mak hetan evidénsia, ho nune’e ami husu ba Komadante Munisípiu Bobonaro atu toma atensaun ka hola médida ruma liuhusi sasaun tuir lei ne’ebé iha, tanba tiru komunidade nia karau, karik komandu la foti médida ba ajente polísia refere, mak ami sei kontinua lori prosesu ne’e ba oin tuir lei”, dehan Postavóz, Celino do Santos liuhusi konferénsia imprensa, segunda (22/03).

Iha fatin hanesan xefe suku Lahomea, Cerílio Mau Leto Lopes, sente triste tanba ema ne’ebé fó seguransa ba povu, fila uza arma estadu nian hodi estraga komunidade nia animal.

“Animal fuik hanesan rusa, dahi no manu sira ne’e de’it estadu bandu katak keta oho, nusa mak komunidade sira-nia animal ne’ebé haki’ak iha sira-nia leet ita estraga lori armada nasaun nian. Nu’udar autoridade ha’u sente la kontente ho atetude hanesan ne’e”, dehan nia.

Atu ne’ebé pesoál ida halo ne’e bele estraga instituisaun nia naran, tanba arma no uniforme ne’ebé pesoál refere uza ne’e estadu nian.

Iha parte seluk, adjuntu komadante munisípiu Bobonaro, Antoninho Mau Luta, rekoñese kazu ne’e akontese duni, tanba ne’e husu na’in ba karau atu aprezenta evidénsia no keixa ba komandu.

“Kazu ida akontese liuba ema tiru karau, iha dader ne’e komunidade ho autoridade sira mai iha komandu munisípiu atu hato’o keixa, depois ida ne’e ha’u liga parte investigasaun atu mai haree no atende, nune’e prosesu ba oin, depois iha ne’ebá kedan ha’u orienta komadante investigasaun atu husu se loos mak na’in ba karau, tanba kazu ne’e krime, entaun só karau nia na’in mak mai aprezenta keixa, la’ós ema seluk mak mai hato’o keixa, tanba kaze ne’e diferente ho kazu krime públiku”, afirma Komandante Mau Luta.

Nia afirma, ema hotu iha lei nia okos, tanba ne’e prosesu sei la’o, depois mak haree oinsá sirkunstánsia husi kazu ne’e depois buka solusaun tuir lei.

“Maibé ha’u-nia membru sira ne’e mak envolve iha krime, ami sei kanaliza hodi hato’o karta ba Komandu Jerál oinsá atu foti ninia prosesu, tanba ha’u nu’udar adjuntu de’it ha’u labele foti desizaun só komadante munisípiu ka interinu mak iha kompeténsia hodi hola desizaun,” katak nia.

Ba ekipamentu ka arma estadu nian ne’e lei la autoriza hodi tiru arbiru, tanba ne’e iha lei atu kondena ida ne’e, bele mós hetan krime arma branka tanba uza arma hodi tiru karau ne’e kontra lei, nune’e tenke prosesu tuir regra.(*)

Rate this item
(0 votes)
Last modified on Tuesday, 23 March 2021 11:36
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« December 2021 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Tempo Timor Networks

Online Counter