Diretór EBC Samut Aben, Moises do Rego hatete, kondisaun eskola ne'e grave liuliu odamatan, janela no hariis-fatin aat hotu, maibé prosesu aprendisajen kontinua la'o.
“Relasiona ho kondisaun eskola ne’ebé grave ne'e ami halo esforsu to'o ikus husi diresaun planeamentu edukasaun Munisípiu nian mai hasai foto de'it, to'o agora sira la tau importánsia ba eskola refere, entaun ba oin ami tenta nafatin ba Edukasaun Munisípiu Bobonaru nian hodi hato'o ba nivél nasionál atu nune'e bele hetan Nia rezultadu bazea ba orsamentu ne’ebé iha”, dehan nia iha EBC Samut Aben ba www.tempotimor.com, tersa, (16/3).
Xefe suku Manapa Jeferino Loco Bere dehan, eskola EBC refere kondisaun aat hotu ona, maibé lahatene edukasaun munisípiu iha osan ka lae atu halo reabilita.
“Ha'u haree eskola ida ne'e úniku tanba aat liu iha postu Kailaku ne'e, depois animál sira mak tama arbiru de'it, tanba komunidade sira seidauk iha konxiénsia katak areador ne'e estadu nian, liuliu Ministériu Edukasaun Juventude Desportu (MEJD) nian”, afirma dehan xefe suku ne'e.
Autoridade lokál ne'e mós husu ba komunidade sira labele husik no kesi animal iha área eskola nian, nune'e labele estrada sasán ne'ebé pertense ba governu.
Sujere mós ba parte eskola atu halo enkontru ho ina-aman husi estudante sira-nia hodi nune'e bele rezolve problema ne'ebé eskola refere enfrenta.
EBC Samut Aben iha estudante hamutuk 482 ne'ebé kompostu primeiru, segundu no terseiru síkulu. No aula ne'ebé akumula ba estudante sira ne'e iha de'it aula neen, entaun tenke fahe ba turnu rua parte dader no lokraik.
Tuir observasaun jornalista www.tempotimor.com iha terenu nota katak, eskola EBC refere kondisaun sira hanesan odamatan, janela, plafon, hariis-fatin no seluk tan ne'ebé aat hotu.(*)