Autoriedade seguransa ida iha fronteira ba www.tempotimor.com hatete, maske vizilánsia iha fonteira kontina ativu, maibé atividade negósiu ilegál mós kontinua la’o.

“Ohin sidadaun ida ho naran inisiál JAP (20) hela iha aldeia Mabelis suku Lebos tenta hatama sigaru husi Atambua mai Timor-Leste, maibé PNTL postu destakadu Lolotoe kaptura kedan iha dalan bainhira suspeitu tenta atu fa’an ba iha kompradór ida ho naran Florindo da Cruz (31) iha suku no aldeia hanesan”, dehan autoriedade seguransa ne’ebé husu atu labele públika nia naran, segunda (15/03).

Maske iha fronteira servisu vizilánsia kontinua funisona, maibé ema balun mós kontinua aproveita hodi halo transaksaun ilegál iha fronetira ne’e.

“Ami nota katak negósiu ilegál sei nafatin kontinua no loron ba loron aumenta ba bei-beik, maske kaptura no hodi ba kuarantena iha postu integradu mota-ain Batugade, maibé sidadaun sira seluk kontinua hala’o nafatin atividade ilegál maske iha situasaun pandemia Covid-19”, dehan nia.

Haree ba kazu konfirmadu iha Timor-Leste sa’e ona ba 196. Husi númeru sira ne’e, abitante na’in-103 mak rekopera ona husi infesaun, na’in-97 mak kontinua baixa iha izolamentu Vera Kruz no Tasitolu no na’in 204 mka kontinua hein rezultadu husi laboratóriu nasionál.

Alende ne’e kazu iha nasaun Indonézia pozitivu sa’e ona ba 1.419.455, husi númeru kazu ne’e na’in 38.426 mak mate ona na’in 1.243.117 mak rekopera ona no sira ne’ebé kontinua ativu hamutuk 137.912. (*)