Tuir António Lema Bere “Leo-Balo” katak, ponte refere kotu iha fulan kotuk, maibé to’o agora parte governu seidauk hadi’a, nune’e difikulta tebes ba komunidade nomós estudante sira.
“Agora udan para ona, maibé sira husi governu seidauk mai hadi’a, entaun ponte ne’e kontinua sai difikuldade boot ba movimentu komunidade nian, inklui estudante sira ne’ebé hela iha mota sorin labele mai eskola, tanba bee boot,” dehan veteranu António ba www.tempotimor.com horseik, (3/3).
Nia afirma, ponte ne’e mak alternativu úniku ba komunidade postu administravu Kailaku liu-liu suku Purugua ne’ebé konsentradu ba Bilimaun, entaun difikulta tebes ba komunidade atu hakat ba mai nomós estudante sira ne’ebé eskola iha Tata ne’ebá.
Komunidade ne’e akresenta, ponte ne’ebé difikulta estudante ho komunidade sira ne’e, iha semana liubá ami liga direta ba deputadu sira liuhusi via telefone iha Parlamentu ne’ebá, entaun sira levanta ona kestaun nee iha Parlamentu Nasionál.
“Deputadu sira levanta ona iha ne’ebá, depois sira fó ona presaun ba Ministeriu Obras Públiku (MOP) hodi nune’e orienta Institutu Jestaun ba Ekipamentu (IJE) para mai normaliza, maibé besik semana ida ona udan la mai, sira mós la mai para normaliza,” dehan António.
Iha parte seluk, Mestre Paulo Mau Pelo Costa filiál iha eskola pre-sekundária Bilimau katak, estdante na’in 24 ne’ebé eskola iha Tara ne’ebé durante ne’e la partisipa ona iha aula, maka eskola filiál Bilimau akumula hotu sira hodi kontinua estudu iha eskola refere.
“Komesa fulan fevereiru, estudante na’in 24 ne’ebé eskola iha Tara, sira-nia inan-aman mai hasoru direta profesór sira iha eskola filiál Bilimau, tanba eskola filial ne’e nia sentru mak EBC Purugua, entaun ami liga ba sentru EBC Purugua, sira mai halo reuniaun ho ami hodi simu estudante sira ne’e no aumenta tan klase nonu anu, tanba atu la simu mós ladi’ak, sira ita-nia oan hotu,” katak Paulo.
Manorin ne’e afirma, relasiona ho tranferénsia estudante sira ne’e iha fallansu oituan tanba estudante sira ne’e nia númeru emis la’ó husi munsípiu Bobonaru, maibé husi Ermra, entaun edkuasaun husi munisípiu rua ne’e presiza rezolve problema ne’e.
“Husu ba edukasaun munisípiu Ermera no Bononaro, tenke iha liña koordenasaun lais ho númeru emis ne’e, tanba sei difikulta ba merenda eskolár nian, tanba tuir dadus estudante sira ne’e asesu merenda escolar iha munisípiu Ermera, la’ós iha Bobonaru,” katak Nia.(*)