Tuir Diretór Saúde Munisípiu Bobonaro, João Baptista Mau Cardoso katak, atividade teste masál ne’ebé hala’o iha liña fronteira, liu-liu munisípiu Bobonaru la’o ho di’ak.
“Ita halo teste masál ba postu administrativu neen hotu iha munisípiu Bobonaru, maibé postu administrativu ne’ebé iha parte ninin ka iha laran liu, ita foti fatin ida ka rua. Entaun ita foku liu ba suku ka aldeia sira ne’ebé mak hela kedan iha liña fonteira. Entaun totál postu ne’ebé ita halo teste hamutuk 18, inklui ona postu administrativu neen ne’e hotu,” dehan Diretór João liuhusi konferénsia imprensa iha edifísiu saúde Bobonaru, Tersa (23/2).
Nia afirma, durante loron lima ka neen ne’ebé ekipa halo servisu haleu Bobonaru, konsege rekolla ona amostra hamutuk rihun 1.292.
“Totál sampel ne’ebé ita rekolla to’o loron ikus 1.292, ne’ebé to’o horseik, teste ne’ebé laboratóriu nasionál halo ona ba sampel 1001. Grasa ba Nai Maromak, tanba rezultadu teste ba sampel 1001 ne’e negativu hotu, sira seluk sei hein rezultadu,” katak Nia.
Nia parte mós agradese ba ekipa Sentru Integradu Jestaun Krize (SIJK) ne’ebé durante ne’e apoiu ona servisu hodi haleu Munisípiu Bobonaro hodi rekolla teste ba abitante sira.
Diretór ne’e afirma, ekipa ne’ebé Organizasaun Mundiál ba Saúde (OMS) propoin mak ekipa tolu ba kada loron, maibé haree ba situasaun ne’ebé iha terenu, ita hamutuk ho parte seguransa hodi kria ekipa barak liu ba fatin hotu-hotu.
“Atu alkansa lalais liu, tuir tarjeitu ne’ebé husi nasionál fó katak tenke atinje sampel rihun ida ba leten, entaun ami prepara ekipa barak liu hodi kobre ba fatin hotu,” nia esplika.
Diretór ne’e akresenta, dezafiu ne’ebé durante ne’e, ekipa hasoru iha terenu la’ós dezafiu ne’ebé boot, maibé buat hotu la’o di’ak.
“Problema maiór laiha, tanba hetan apoiu husi parte seguransa hodi organiza komunidade sira hodi hola parte iha atividade rekolla amostra sira ne’e, entaun buat hotu la’o ho di’ak, mezmu iha autoriedade lokál balun mak kestiona katak, parte saúde la halo sosializasaun, maibé ba foti de’it sampel,” katak Nia.
Entretantu, komunidade iha Munsípiu Bobonaru, liu-liu fatin ne’ebé sai tarjeiru hodi foti amostra ne’e, komunidae sira koopera ho di’ak, mezmu iha fatin balun ne’ebé tenke hetan obrigasaun husi parte seguransa.(*)