Abitante na’in-17 ne'e komposta hosi estudante Timoroan sira-ne’ebé tama ilegál tanba dokumentu estudu nian hanesan KITAS no pasaporte atu inválidu ona, nune’e obriga sira tama ilegál husi munisípiu Covalima, no Bobonaro hodi entrega aan ba Unidade Polísia Fronteira (UPF) iha liña fronteira.

“Ema sira tama ilegál ne’e kada semana ita relata beibeik ninia dadus, só dadus ohin nian de’it maka ema tama ilegál hamutuk 17,” Portavós Komandu PNTL, Superientendente de Araújo Arnaldo informa ba jornalista iha Komandu Jerál PNTL, Kaikoli, tersa (16/02).

Nia hatutan, ba oin PNTL sei kriminaliza sidadaun sira-ne’e, hafoin kumpre kuarentena obrigatóriu durante loron 14 iha Batugade.

Komandante Arnaldo rekoñese katak, maske forsa sira halo seguransa maka'as ona iha fronteira, maibé abitante sira kontinua tama iha tempu kalan-boot, tanba liña fronteira luan susar ba polísia atu deteta tama iha tempu kalan-boot ho dadeer madrugada.

“Ita-nia maluk sira-ne’e ulun fatuk moruk sempre gosta liuhusi Indonézia ne’ebá, to'o ikus lori moras mai, maibé ha’u atu dehan katak, forsa rua halo ona seguransa másimu tebes,” nia hatete.

Arnaldo hatutan, PNTL mós koloka ona forsa ba estabelesimentu destakamentu unidade territoriál sira hodi apoia forsa tátiku sira iha fronteira Bobonaro, Covalima, RAEOA no Ataúro nian no halo pasa-revista.

“Komandu jerál koloka ona forsa ba destakamentu unidade territoriál nian hodi dezloka ba fronteira rua ne’e,” nia hatete.

Nia informa, daudaun ne'e mós Komandu PNTL hari'i ona postu provizóriu iha área Atabae, Balibo, Tunubibi, Covalima, RAEOA no Ataúro.(*)