Tempotimor (Dili) - Primeiru Ministru, Taur Matan Ruak, asina plaka ba bee moos ne'ebe dada ona iha Munisípiu Baukau, Postu Administrativa Baguia, Suku Haekoni, Aldeia Uaiboro ho Uaibitai.

Prezidente Ezekutivu organizasaun naun governamentál (ONG) Alfa Star, Albertino Emilio França hatete, bee moos ne'ebe dada iha postu administrativu Baguia remata ona iha 2018, nune'e lori plaka mai Primeiru Ministru, Taur Matan Ruak, hodi asina.

"Ohin hasoru primeiru ministru atu asina plaka ba projetu ida ne'ebe ami halo iha parte Baguia nian besik mós primeiru ministru nia uma iha Aldeia Uaiboro ho Uaibitai", dehan nia, iha Palásiu Governu, Segunda (24/2).

Projetu sistema bee moos ne'e apoiu husi povu Japaun, iha 2018, ho montante orsamentu rihun US$ 89.

Nune'e, sistema bee moos ne'e, komunidade aldeia rua ho família uma kain 80 mak asesu ona dezde 2018.

"Iha tempu inagurasaun Novembru 2018 ami mós haruka karta mai primeru ministru hodi partisipa iha serimonia ne'e, maibé iha momentu ne'ebá preokupa ho atividade importante balu, entau la konsege ba asina. Tanba ne'e, Embaixadór Japaun asina ona no ohin ami lori mai Primeiru Ministru asina", tenik nia. (*)