Administradór postu administrativu Venilale, Miguel Mendes Manso Guterres hatete, akontese rai nakdoko ne'e, rezulta rai nakfera no monu iha suku Uailaha no Badoho. Tanba ne'e iha ona tereñu atu halo indentifikasaun ba komunidade sira nia uma no plantasaun sira.
"Rai halai ne'e, estrada fera, mais ou menus kilo-metru hira kedas, iha Badoho aldeia umanaiku nian, iha fali Uailaha aldeia Caubai nian, rai fera ne'e pur-volta kilómentru haat," dehan Miguel ba www.tempotimor.com liuhusi via telefone, Kinta (30/12)
Nia dehan, husi akontese ne'e fó risku ba komunidade nia uma hamutuk lima, uma adat rua, ai-riin eletrisidade inklui natar komunidade nian, ne'ebé pertense ba suku Uailaha aldeia Caubai.
Alende ne’e, estrada diresaun suku Badoho nian rezulta nakfera fó difikulta ba trasporte hanesan karreta labele liu. Maibé kona-ba natar horsida extensionista sira bele fó informasaun.
Iha parte seluk, xefe suku Badoho, Marcus António Ximenes hatete, husi akontese rai nakdoko ne’e fó afeta ba estrada inklui komunidade nia hela fatin ho kustume sira.
"Iha ne'e afeita mós ba natar, to'os, estrada, uma (hela fatin) uma lisan. Iha aldeia rua ne'e estragus dalan atu ba sede suku mós ladi'ak hotu," hateten xefe suku ne’e.
Tanba ne'e, hamutuk ona ho ekipa husi servisu protesaun sivíl munisípiu Baukau, servisu agrikultura munisípiu Baukau inklui autoridade postu no suku verifika hela dadus kona-ba akontesementu refere.
Hodi hakotu, xefe suku Badoho husu ba Ministéiru Agrikultura no Peskas (MAP) atu tau atensaun ba asuntu refere, tanba komunidade husi suku Badoho no Uailaha barak mak lakon ona sira-nia natar, to’os no plantasaun sira.(*)