David Ximenes hanesan motorista sente triste, bainhira ponte ne'e hetan estragu husi udan boot, difikulta sira atu tula pasajeiru ba Baukau Vila.

"Agora ponte ne'e monu ami labele liu-ona, ponte ne'e monu, tanba udan horisehik  iha ami-nian ne'e hahú meiudia tuku 01:00 to'o foin madrugada tuku 04:00 ne'e mak para”, dehan David ba www.tempotimor.com, iha Baukau, sesta (24/12).

Tanba ne'e, pasajeiru sira obrigatóriu tuun husi karreta tenke la'o ain husi área Samagia nian ba postu Administrativu Laga hodi hein karreta seluk kontinua viajen ba Baukau Vila.

Komunidade ne'ebé mak asesu dalan ne'e husi Suku-3 hanesan, Suku Namanei, Afaça, Gurusa'a inklui Uaitame balun.

"Ohin iha inan sira ne'ebé atu ba merkadu fa’an sira nia sasán mós iha, sira tenke tutur sira-nia sasán la'o ain de'it ba to'o iha laga mak sa'e karreta”, afirma nia.

Tanba ne'e nia parte husu ba Governu liuhusi Diresaun Servisu Obras Públiku Munisípiu Baukau bele hadi’a hikas iha tempu dabak nia laran nune'e transporte sira bele asesu.

Nune'e pasajeiru Sónia Boavida mós sente triste, tanba nia parte labele lori nia produtu hirak ne'e to'o iha merkadu hodi fa'an.

"Produtu ne'ebé ha'u lori mak hanesan ai-farina tahan, haas, feuk dikin sira ne'e atu ba fa'an hodi hetan osan, haree oan sira-nia eskola, maibé agora ha'u labele liu, tanba karreta labele liu, sasán todan ha'u labele lori to'o laga hodi hein karreta seluk”, hatete nia.

Ponte ho luan metru-7 pertense ba Aldeia Samagia, Suku Tekinomata pertense ba Postu Administrativu Laga, maibé dalan ne'e asesu husi Komunidade Suku Namanei, Afaça, Gurusa'a inklui Uaitame balun ne’ebé pertense ba postu Administrativu Kailikai Munisípiu Baukau.

Tuir observasaun www.tempotimor.com iha tereñu nota, komunidade husi Suku-4 ne'e hahú normaliza hanesan lalin fatuk no rai hodi taka netik nune'e trasporte hanesan karreta no motorizada bele halo movimentu. (*)