Print this page

Estrada Suku Soba Aat, ‘Obriga Hapara’ Programa UKL iha Asanunu

By December 09, 2021 1269
Xefe Suku Soba, Francisca Monica de Fatima. Xefe Suku Soba, Francisca Monica de Fatima. Foto Suplay

Tempotimor (Baukau)-Xefe Suku Soba, Francisca Monica de Fatima hatete, kondisaun estrada husi Postu Administrativu Laga ba Suku Soba, Aldeia Asanunu no Fatiliri ne’ebé aat obriga hapara implementasaun Programa Uma Kbi'it La'ek (UKL) iha Aldeia Asanunu.

"Aldeia Asanunu mak sai na’in ba uma UKL nian, maibé  seidauk realiza, tanba de'it estrada aat tempu udan mota tuun, Tanba ne’e mak seidauk realiza to'o agora”, informa Francisca, iha Baukau, kuarta (08/12).

Tanba estrada ne’ebé sai impaktu ba Programa Nasionál Desenvolvimentu Suku (PNDS) atu konstrui uma ba família la'ek sira iha Aldeia Asanunu Suku, Soba Postu Administrativu Laga, Munisípiu Baukau, ne’ebé identifika sai benefisiariu.

Nune'e komunidade husi Aldeia-2 refere inisiativa loke dalan kuaze kilometru ualu (8) ho luan metru husi dalan boot ba Aldeia refere, maibé iha tempu udan transporte labele asesu.

Dalan ne'ebé mak komunidade husi Aldeia-2 inisiativa loke transpórte hanesan motorizada bele liu, maibé karreta seidauk bele asesu, tanba dalan refere sa'e suvida maka’as no fatuk boot barak seidauk halo rahun.

“Dalan ne’e mak akontese, bainhira inan isin-rua no moras emerjénsia sira presiza ba postu saúde, dala barak hulan mak lori ba dalan boot hodi tula ho ambulánsia lori ba postu saúde”, hatete nia.

Bainhira tempu udan sai preukupasaun ba estudante sira atu asesu ba tuir aprendizajen, tanba husi aldeia refere ba eskola tenke hakur mota.

Hanesan lideransa Suku kontinua husu tulun ba Institutu Jestaun Ekipamentu (IJE) ajuda komunidade sira-nia inisiativa loke dalan luan atu komunidade sira bele asesu.

“Ami-nia planu hatama kedas iha 2008, to'o agora, maibé seidauk realiza nafatin, nomós iha 2021 ne'e husi aldeia rua ne'e mós halo tiha ona proposta ba IJE maibé to'o agora seidauk”, informa nia.

Koordenadór Institutu Jestaun Ekipamentu Baukau, Angelo Maria Ferreira da Silva hatete, proposta ne'ebé mak kada suku hato'o ba IJE la'ós latau ba konsiderasaun, maibé durante IJE hala'o mós servisu prepara ba loron-28 Novembru nian hodi ekipamentu sira avaria dadaun hala'o manutensaun iha nasionál.

"Agora halo manutensaun hela, foin dadauk 28 novembru nian ita realiza tiha mákina eskavator, loder silindru lori tun ba Díli tama ofisina sira hadi’a hela”, esplika nia.

Material atu troka ba ekipamentu sira-nia problema dadaun ne’e hameno ona iha nasaun seluk bainhira to'o, manutensaun hahú fali ona servisu, tanba ekipamentu ne'ebé mak avaria hanesan silindru presiza solda, enkuantu eskavator presiza troka gir no korenti.

Bainhira remata manutensaun atu hala'o fali servisu mós presiza haree fali ba proposta husi Suku diriji ba IJE, tanba proposta refere balun antes ne'e tama ona iha IJE no proposta emerjénsia.

Ba populasaun sira ne’ebé hela iha Suku Soba, Postu Administrativu Laga, ho totál hamutuk 2853. (*)

Rate this item
(1 Vote)
Last modified on Thursday, 09 December 2021 11:04
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items