"Sim desde ukun-an to’o mai agora uma-kain hamutuk 268 iha suku Samalari ne’e seidauk asesu ba liña eletrisidade, no ida ne'e nu'udar difikuldade boot ne'ebé ha'u-nia komunidade sira hasoru iha ami-nia suku”, dehan Xefe Suku Samalari, Paulino da Cruz Castelhano, kinta (16/09).
Tanba ne'e nu'udar autoridade lokál sempre preokupa no tenta nafatin hodi hein responde husi proposta ne'ebé hato'o ona ba parte relevante desde iha tinan 2013 to’o 2021.
"Sim proposta ne'e ha'u hatama tiha ona iha tinan 2013 maibé laiha rezultadu, tanba ne'e iha tinan ida ne'e mós ha'u hatama tan iha fulan-juñu nia laran ona e nafatin laiha rezultadu, maibé ha'u nu'udar autoridade lokál sei tenta nafatin”, hatete nia.
Iha tinan 2013 Komunidade sira mós simu solár panel hodi uza maibé tanba tempu naruk ona entaun sasán sira ne'e aat hotu no dadaun ne'e sira uza lampu tradisionál iha tempu kalan.
"Tanba ne'e nu'udar autoridade ha'u sei esforsu nafatin oinsá atu tenta ho proposta ne'ebé ami hatama, relasiona mós ho programa VIII Governu nia planu katak tinan oin territóriu nasionál asesu hotu liña eletrisidade, tanba ne'e ha'u sei koko nafatin no espera ami-nia suku mós inklui hotu iha laran”, afirma nia.
Totál populasaun iha Suku Samalari hamutuk 2.129 huai Taubere, Iraoso, Daraloi-Leten no Daraloi-Kraik. (*)