Iha inisiu fulan Abril tinan ne’e bainhira mosu dezastre iha fatin-fatin, Suku Tirilolo mós enfrenta situasaun hanesan. Anin boot no udan rezulta riin eletrisidade ne’ebé harii iha aldeia rua nia klaran monu.

Haree ba situasaun ida ne’e, autoridade lokal informa lalais ba parte EDTL Baukau atu bele hadi’a, maibé resposta ne’ebé simu halo sira nia liman-ain sai mamar.

"Ha’u hato’o ona ba EDTL Munisipiu Baukau. Ha’u hato’o iha momentu anin boot depois udan tau ne'e, ai riin rua ne'e monu, ha'u telefone kedas sira, sira diretamente to'o kedas iha fatin, maibé momentu ne'e ahi mate sira halakan fali ahi. Depois sira dehan ami sei hato'o tiha ba nasional mak bele mai hadia," dehan Xefe Suku Tirilolo Ricardo Belo (48) ba tempotimor, Tersa (28/05/2019).

Aleinde riin eletrisidade rua ne’ebé tohar, Xefe Suku ne’ebe hein hela autoridade sira ninia atuasaun hodi hadia lalais besi riin ne'ebe monu atu labele fo impaktu ba besi riin rua seluk mak haliis ona no bele monu tan bainhira anin boot.

“Fiu sira ne’e husik hela de’it iha estrada leten. Ha’u tauk mak ahi haan fali fiu ne’e problema boot. Depois riin rua ne'ebé iha sorin mós halis ona, se anin boot tan, rua ne'e bele monu tan. Se monu tan nia impaktu sei mai tan fali sorin ne'e hotu.”

Kona-ba ahi ba komunidade sira mate ka lakan, autoridade lokal ne’e dehan, bainhira kazu ne’e akontese ahi iha Kaisidu tomak mate, maibé ikus mai lakan fila fali.

"Ahi lakan fila fali tanba sira dehan fiu tesi tiha ona, ha'u mós ladun hatene, maibé momentu monu ho monu ne'e ahi iha Kaisidu laran mate hotu kedas.”

Xefe Suku ne’e hatete, nia mós ladun kompriende kona-ba liña eletrisidade nian, maibé bainhira riin ne’e la hadia no halo lakan fali ahi bele fó impaktu mós ba komunidade sira.

“Riin ne’e mak monu hanesan ne'e nafatin, fiu ne'e iha nafatin estrada leten, ahi lakan fali ona. Momentu ne'e ha'u dehan ba sira katak señor sira ida ne'e bele fó impaktu ba ema sira tanba labarik estudante sira mós la’o ba-mai hela.”

Maibé, nia hatete, ekipa EDTL Baukau ne’ebé mai haree to’o ohin loron la halo asaun ruma hodi hadia.

Tan ne’e, nia husu ba EDTL atu bele tuun ba hodi hadia nune’e labele fó impaktu ba komunidade sira ne’ebé hela besik no la’o ba-mai iha fatin refere.

“Besik bailoron ona, duut sira mós maran depois ema ruma sunu duut ne'e bele kona fiu ne'e tanba fiu balun mak iha estrada maibé balun iha duut laran hela,” dehan nia.