Nia kestiona asuntu ne'e tanba to'o ohin loron povu iha munisipiu Baucau kontinua ejize governu atu tau bee moos iha hospital rejionál Baucau, maibé realidade ejizénsia hirak ne’e hela ho rezultadu mamuk.

"Até agora Baukau sei hakilar nafatin ba bee-moos iha hospital, mais Ministeriu Saúde rasik taka matan no tilun diuk la rona, matan delek la hare ba sofrimentu pasiente nomós komunidade iha hospital rejional Baukau," Deputada ne’e kestiona iha PN, Kinta (7/1).

Nia kestiona katak, dalaruma governante sira mak laiha kapasidade no laiha responsabilidade ba problema sira ne'ebé komunidade husi hospital rejional hato'o.

Kona-ba osan ne'ebe atu halo manutensaun ba bee moos ne'e nia haktuir, imposivel atu governu dehan osan laiha, tanba osan ne'ebe parlamentu aprova hahu husi tinan 2019 to'o 2020, inklui 2021 ne'e ho montante ne'ebé mak boot.

"Sé sira dehan osan laiha, ne'e imposivél, tanba iha parlamentu nasional, ami rasik halo audiénsia publika kona-ba OJE ne'ebe mai husi tinan 2019 mos iha, 2020 mos iha, no orsamentu 2021 nian ne'ebe mak aprovasaun ho montante boot tebes. Maibe realidade sira la responde ida ne'e, ida ne'e hatudu ba ita katak, governu ida ne'e laiha kapasidade,"nia kestiona.

Kona-ba bee ba hospital ne'e nia konta tuir katak, durante ne'e bankada CNRT iha PN sempre levanta ba iha membru governu sira atu tau prioridade, tanba bee moos no atendimentu saúde ne'e servisu ida ne'ebè intergrade.

Nia preokupa asuntu ne'e tanba, tuir loloos Servisu Agua no Saneamnetu (SAS) mak atu tau atensaun maibé lahatene kestaun ida ne'e dalaruma sira mak laiha kapasidade iha liña koordenasaun ba malu atu ba hadi’a. (*)