“Sarani sira hirus ami, pasiénsia. Buat ne'e la'os Uma-kreda mak lakohi halo misa, maibé ita tenke la'o tuir buat ne'ebé nasaun nian. Moras ne'e la mai hili de'it sira jentiu, ne’ebé hirak sarani ne'e komu ba uma kreda be moras la kona. Ne'e duni moras ne'e hili de'it ema jentiu sira. Sé nune'e karik, laiha problema. Agora, moras ne'e, lahatene ema fiar iha Maromak ka la fiar iha Maromak, fiar Jesus Cristo ka la fiar Jesus Cristo,” Bispu Dioseze Baucau, Dom Basilio do Nascimento, aviza ba sarani sira iha munisípiu Baucau, Domingu (3/1).

Bispu Basilio fó hanoin katak, governu hola desizaun la'ós tanba governu hakarak mangame maibé tanba moras ne’e perigozu.

“Ita-boot sira sei hanoin iha Páskua, ita iha kazu 19, ita hahú atrapalladu oituan. Agora iha ona kazu 44 no buat ne'e kuandu hanesan tékniku sira dehan, uluk ne'e ita ta’uk ema husi li’ur mak lori mai. Maibé, agora ta’uk ne'e, Oekusi laran hahú, sé ita iha timor laran mak moras ne'e komesa liuhusi ita mak ba hirak seluk, baino sira, ita fiar ka la fiar, ita oan be tokon oan ida-ne'e kuandu kona, ba hotu, timor mamuk,” nia katak.

Nune'e Bispu baucau ne'e husu sarani sira atu kuidadu ne'e presiza no halo tuir desizaun ne'ebe governu foti.

"Bainhira governu foti desizaun katak hahú aban (4/1) to'o dia 4 de Fevereiru, desizaun governu nian ne'e mantein. Bispo sira mós, enkuantu governu la foti, la hasai fali desizaun ida ne'e, Bispu sira sei tuir nafatin buat ne'ebé governu hato'o. Ne'e duni, labele halibur ema barak. Iha sarani ida iha nia hakerek ne'e dehan, agora Uma-kreda mós hakru'uk hotu ba governu. Ita tenke haree sasan ne'e, la'os ita haree ita nia kintál," Amo Basilio hateten. (*)