Tuir Miguel, husi prosesu reabilitasaun sede suku sira ne’e, parte ida atu apoia servisu suku nian iha baze hodi to’o iha nasionál.
“Iha tinan oin, ita sei halo reabilitasaun ba sede suku hotu iha Timor laran tomak, hamutuk 250. Purtantu, ne’e hanesan esforsu ida ne’ebé mak governu halo para bele rekoñese suku, enkuantu hanesan asosiasaun komunitáriu para apoiu servisu administrasaun komunidade nian,” Miguel ko’alia hodi hatán ba preokupasaun povu Baukau nian kona-ba kondisaun sede suku balun aat ona, Kinta (17/12).
Nia mós esklarese ba autoriedade lokál Baukau katak, iha 2021, sede suku hamutuk 23 mak sei rabilita iha munisípiu Baukau.
“Tinan ne’e ita sei reabilita sede suku 23, tinan oin ita reabilita 11, tanba ne’e iha munisípiu Baukau ita sei reabilita sede suku hamutuk 34,” Miguel promete.
Entretantu, preokupasaun seluk ne’ebé autoriedade lokál sira hato’o kona-ba atu aumenta orsamentu ba Planu Nasionál Dezenvolvimentu Suku (PNDS) ne’e governu rejista, tanba to’o agora, governu TL halo ona despeza tokon $5 ba munisípiu Baukau.
“Halo projeitu PNDS iha munisípiu Baukau ne’e purvolta 176 projeitu, tanba ne’e iha tinan oin, PNDS sei implementa iha suku 26 ho total orsamentu tokon $1.3, tanba suku sira ne’ebé iha postu Venilale, Baguia no Vemasse, PNDS sei tama iha imi-nia suku, maibé só osan iha rihun $50 de’it ba kada suku, entaun ita husu para aumenta oituan ba rihun $6 ka rihun $150,” nia dehan.
Projeitu PNDS tama iha suku sira ne’e, parte ida atu tetu ba sustentabilidade fiskál rai nian inklui kapasidade suku nian hodi jere osan sira ne’e.(*)
