PR Lú Olo: “CNRT Kesar Ha’u Dala 3, Maibé Lakon Hotu”

Udan Bo'ot iha baukau, Sumbrina taka Prezidente da Republika Dr. Francisco guterres Lu Olo halo enseramentu sedu de'it ba dialogu iha resintu adminitrasaun munisipal Baukau, kinta (17/12) Udan Bo'ot iha baukau, Sumbrina taka Prezidente da Republika Dr. Francisco guterres Lu Olo halo enseramentu sedu de'it ba dialogu iha resintu adminitrasaun munisipal Baukau, kinta (17/12) Foto Tempo Timor

Tempotimor (Baukau)-Prezidente Repúblika (PR) Francisco Guterres Lú Olo hala’o deklarasaun polítika ba povu munisípiu Baukau katak, durante mandatu, partidu Congresso Nacionál Reconstrução Timorense (CNRT) ho nia aliadu sira keixa ba Tribunál dala-tolu, maibé CNRT la manan nein dala ida.

Lia hirak ne’e, PR Lú Olo hato’o ba povu Baukau durante hala’o diálogu loron tomak.

“Iha nasaun ida ne’ebé mak sidadaun ida, invez-de ba hasoru malu ho PR, maibé ba kesar diretamente PR ba iha tribunál, só PR ida naran Lú Olo ne’e mak ema kesar iha tribunál dala tolu ka dala haat, lakon hotu, nein ida manan iha Tribunál, ne’e hateten loloos ba ita-boot sira,” PR Lú Olo dehan ba povu Baukau liuhusi nia intervensaun iha diálogu, Kinta (17/12).

Xefe estadu mós konta katak, kesar dahuluk ne’ebé CNRT nia ekipa ida halo hasoru PR Lú Olo, hala’o iha 2018.

“Jurista ida naran Mélio de Jesus ho ekipa ida, kesar PR ba Tribunál, tanba la fó pose ba membru governu na’in ualu, liuhusi PDHJ, entaun PDHJ hamutuk ho sira hodi kesar PR ba Tribunál, maibé PR la hafodak, Tribunál mak sei deside, maibé ikus mai Tribunál dehan atu fó pose ka la fó pose ne’e kompeténsia PR nian, ikus mai nonok lakon tiha,” Lú Olo hateten ba povu Baukau.

Aman ba nasaun ne’e akresenta, keixa daruak ne’ebé CNRT halo kontra tan PR ne’e lidera husi doutór Manuel Tilman.

“Doutór Manuel Tilman tuur tiha iha televizaun nia oin katak, PR viola konstituisaun entaun ami tenke kesar ba Tribunál, entaun ha’u hanoin, sira kesar tan tiha ona ne’e ha’u hein de’it ka oinsa, ha’u hanoin doutór Manuel Tilman ko’alia halimar, mais afinal tebes duni, tanba malae ida iha Portugal ne’ebá fó pareser mai kondena loos PR katak, viola ida ne’e, viola ida ne’ebá, entaun advogadu Manuel Tilman ho deputadu 18 hamutuk ho malae ida ne’e lori PR ba Tribunál entaun dehan ba mak ha’u tuir,” nia dehan.

PR afirma, maske kesar ne’e to’o tiha Tribunál, maibé la to’o de’it semana ida Tribunál indefere fali katak, kesar ne’e la’o sala dalan tanba la liu husi Parlamentu Nasionál (PN) maibé ba lurus de’it.

“Tuir loloos se ita-boot sira dehan PR viola, loloos ne’e imi tenke aprezenta ona faktus kona-ba violasaun direitu umanu, para aprezenta kauza husi pedidu ne’e, maibé Manuel Tilman dehan, lae ami mai husu de’it

Tribunál atu ko’alia baa mi katak PR viola konstituisaun ka lae?, maibé Tribunál dehan, Tribunál ne’e atu tesi lia, la’ós ko’alia fali PR nia sala ba imi,” PR Lú Olo hateten ho espresaun hamansa hamutuk ho povu Baukau.

Nia salienta, husi desizaun Tribunál nian ne’e halo CNRT la satisfeitu (lapuas), entaun sira dehan ami lakon tanba momentu ne’e hasai tiha artigu 150 husi konstituisaun RDTL, entaun CNRT kesar dala ida tan.

“Ami tenke kesar fali tan dala ida ho artigu 150 husi K-RDTL ne’e hasoru PR Lú Olo, ninia prosesu hotu hanesan só ninia kauza de pedir mak husu fiskalizasaun abstrata susesiva ba fali kona-ba dekretu PR nian kona-ba nomeiasaun membru goernu nian. Ne’ebé ha’u haree, ba mak ita ko’alia, mais ha’u haree katak artigu 150 K-RDTL ne’e dook loos ona,” nia esplika.

PR ne’e dehan, liu de’it semana ida Tribunál haruka fila tan katak, fiskalizasaun susesiva abstratu ne’e bele halo ba norma sira husi PN no governu, maibé dekretu prezidente ne’e aktu polítika, tanba konstituisaun ba fó kompeténsia ba prezidente hodi deside.(*)

Rate this item
(4 votes)
Last modified on Thursday, 17 December 2020 22:55
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter