Tuir loloos PR Lú Olo sei hakarak atu responde preokupasaun povu Baukau, maibé natureza mak hapara diálogu ne’ebé ho tema “Dada lia ho Lú Olo ho diálogu sei hetan solusaun ba problema ne’ebé de’it,”.
“PR ho laran susar oituan, maibé ha’u haksolok nafatin hodi simu ita-boot sira-nia preokupasaun sira, hodi lori ba governu,” PR Lú Olo hateetn ba povu Baukau iha momentu ne’ebé udan maka’as ona, Kinta (17/12).
Ho situasaun ne’ebé akontese, PR lú Olo garante ba povu munisípiu Baukau katak, sei hato’o ho resposta eskritu, depois enkamiña ba Primeiru Ministru (PM) Taur Matan Ruak ho nia membru sira.
“Ha’u hakarak garante ba ita-boot sira hotu katak ida-idak ninia perguntas ne’ebé imi hato’o mai, prezidénsia da repúblika sei rejistu hotu depois sei halo relatóriu kompleta ida hodi hato’o ba PM no ninia membru governu sira hotu kona-ba Baukau ninia kondisaun sósio-ekonómiku ne’ebé ohin aprezenta,” Lú Olo dehan.
Iha fatin hanesan, Xefe suku Ahekoni Luis de Oliveira hateten, diálogu ohin ne’e di’ak tebes, maibé tanba udan entaun labele responde saida mak povu hato’o tiha ona.
“Labele responde ami-nia preokupasaun sira ne’ebé ohin ami hato’o tiha ona, tanba udan, entaun para ona, ita labele obriga PR atu responde. Maibé tuir ha’u-nia hanoin de’it katak, buat sira ne’e akontese tanba dalaruma ita la halo vizita ba ita-nia matebian sira no eroi sira, entaun bele fó dalan hodi buat sira ne’e akontese,” nia dehan.(*)