Xefe estadu ko’alia ba povu Baukau bainhira halo intervensaun iha diálogu aberta ne’ebé hala’o ho povu Baukau.
“Ha’u vizita ba eskola sira ne’ebé ita-nia oan sira eskola ba, eskola sira ne’e aat hotu ona, balun di’ak, maibé eskola sira ne’e balun harii iha ita-nia bei-ala sira-nia tempu to’o agora seidauk iha reabilitasaun, eskola ne’e moris kedas iha bei-ala sira nia tempu,” PR Lú Olo dehan ba povu Baukau, Kinta (17/12).
Nia mós hateten, deputadu sira iha Parlamentu Nasionál ne’ebé liu ona ba tinan sira kotuk, sempre aprova orsamentu iha tinan-tinan, maibé eskola sira nafatin de’it, laiha mudansa.
“Orsamentu sira tinan uluk nian ne’e aprova hela de’it katak, área saudé, agrikultura, edukasaun nian hanesan ne’e, maibé liu tiha tinan ida hanesan ne’e ita mai haree fali eskola ne’e nafatin de’it, depois horseik diretór sira aprezenta relatóriu katak eskola sira ne’e estragus liu ona tinan sanulu, signifika tinan sanulu ne’e mak liu tiha ona, maibé eskola nafatin de’it, labarik sira ba eskola,” nia dehan.
Xefe estadu fiar ba oitavu governu vibilizadu husi Fretilin sei halo buat di’ak ba seitór importante sira hanesan edukasaun, saúde, agrikultura, nune’e bele garantia nasaun nia destinu di’ak iha futuru.
Entretantu eskola sira ne’ebé PR Lú Olo vizita mak hanesan Eskola Sekundária Jerál númeru 01 Baukau, Eskola sekundáriu Jerál Kilik Uaiga’e no Eskola Báziku Filiál Caibada, Ensinu Báziku Sentrál Aubaca “Biki Sahe” Triloka.(*)