Iha diálogu ne’e, rezidente repúblika Francisco Guterres Lú Olo abertura ho minutu de silénsiu hodi hanoin hikas ba eroi sira ne’ebé selu sira-nia vida tomak ba povu no nasaun Timor-Leste.
“Iha tinan balun ba kotuk, ha’u-nia uma lisan fó sai hau iha Aeroportu Baukau, hahú kampaña, iha ne’ebá tiu ida dehan ho lian Baukau katak Lú Olo ami mai fase o-nia liman, ain para hasoru loron no fulan ne’ebé sei mai, signifika ami hasai o husi uma ida ne’e para sai Prezidente Repúblika ba povu tomak, entaun ohin mai fali katak ha’u sai duni prezidente ba povu tomak,” dehan Prezidente Lú Olo iha nia diskursu, Kinta (17/12).
Lú Olo mós agradese ba povu munisípiu Baukau ne’ebé fó ona konfiansa ba ha’u hodi sai prezidente ba povu tomak, entaun ha’u lakohi ko’alia barak, ha’u hakarak rona barak husi imi.
“Duke ha’u mak ko’alia barak liu, di’ak liu ha’u rona barak liu husi ita-boot sira, kona-ba situasaun sira hotu iha munisípiu Baukau nian,” Nia dehan.
Entretantu tuir observasaun www.tempotimor.com iha terenu nota katak, entidade sira ne’ebé partisipa iha diálogu ne’e mak hanesan veteranu, sosiedade sivíl, autoriedade lokál, estudante, organizasaun internasionál membru Parlamentu Nasionál (PN) inklui membru governu sira.
Alende ne’e, molok ohin PR Lú Olo halo diálogu ho povu Baukau, PR Lú Olo mós halo uluk ona vizita ba eskola, grupu produsaun no seluk tan.(*)