Koordenadora Hafuku Marialinha da Costa Tilman orgullu tebes, tanba PR bele mai haree direta grupu Hafuku nia servisu durante ne'e.
"Ami sente kontente tebes, tanba PR bele mai to'o iha ne'e hodi koñese no hatene ami-nia atividade, tanba iha ne'e ami feto sira iha ne'e hetan kapasitasaun mai husi NGO World Vision no Tomak, nune'e ami bele implementa servisu sira ne'e," Marialinha hateten iha nia servisu fatin Triloka, Kuarta (16/12).
Grupu ne’e rasik Marialinha da Costa Tilman mak funda atu halibur feto maluk sira, oinsa atu promove ai-han lokal sai fila fali ba ai-han industria uma nian.
"Hahan sira ne'ebé halo husi ita-nia to'os ne'e labele abandona nomós hatene atu da'an de'it, tunu de'it maibé, ita mós halo fila fali ai-han sai industria uma nian bele tau fulan no loron atu ita bele han," nia esplika.
Iha fatin hanesan xefe suku Triloka Alexandre da Costa konsidera prezensa PR nian bele motiva grupu ne'e bele la'o ba oin.
"Nu'udar autoridade lokál nia sente kontente ho prezensa prezidente nian, tanba mai haree direita buat ne'ebé ami halo, no motiva ami oinsa bele hanoin hodi haree kondisaun komunidade sira-nia no bele ajuda habelar di'ak liután," nia hateten.
Xefe suku ne'e dehan, grupu Hafuku nia atividade mak kuda fehuk, fore-rai fore-keli, tomate, estroberry no seluk tan, no grupu ne'e nia atividade mós haree ba iha má nutrisaun labarik sira tinan 5 mai kraik.
Grupu nee harii kuaze tinan 10 resin ona ne'ebé kompostu husi membru na'in 15 iha feto no mane.
"Ha'u rekomenda ba Prezidente ne'ebé mai hanesan aman nasaun nian, ho situasaun ida ne'e karik serbisu ladun di'ak fó motivu nune'e ba oin serbisu di'ak liután," nia hateten.
Observasaun www.tempotimor.com nian iha terenu nota katak, PR Lú Olo to'o iha fatin Hafuku nian, ekipa simu ho lia dadolin no tara tais no kontonua vizita fatin produsaun nian.
Atividade ne'ebé grupu Hafuka halo mak kuza fahuk midar, estroberry, fore-rai, fore-keli, buanagah, inklui husi produtu sira ne'e Hafuku mós produz fali fore-keli ba tahu, tempe no susu-been, produsaun ba kripik hudi, kulu, fore-keli nomós husi kamí produz ba mina.(*)
