Xefe suku Triloka, Alexandre da Costa, ukun-aan tinan 18 ona maibé postu saúde ba suku Triloka seidauk iha, alende ne'e komunidade hamutuk uma-ka'in 17 seidauk asesu ba liña eletrisidade.

"Preokupasaun ami-nian iha ne'e mak postu saúde, tanba to'o oras ne'e seidauk iha, no sede suku mos uza nafatin tempu Indonézia nian maibé aat ona seidauk hadi'a," dehan Xefe suku Triloka Alexandre hafoin akompana grupu Hafuku hodi simu vizita PR Lú Olo, Kuarta (16/12).

Autoriedade lokál ne'e mós dehan, alende husi sentru saúde no sede suku, komunidade balun mós seidauk asesu eletrisidade.

"Iha ne'e uma-ka'in 17 mak seidauk asesu eletrisidade tanba dook husi estrada, no asesu ona ne'e 95% nee ita ko'alia hanesan ne'e no 5% mak seidauk asesu," nia informa.

Entretantu suku Triloka kompostu husi Aldeia haat mak hanesan Lekluatu, Makadai, Badaho, Aubaca ne'ebé ho totál populasaun 2.200 resin ne'ebé kompostu husi feto no mane nomós suku Triloka de'it iha nia médida largura 35 kilomentru kuadradu.(*)