Xefe Estadu hateten, TL tenke avansa ho nia produtu rasik, tanba to'o agora TL kontinua depende ba sasan importasaun.
"Se ita halo ekonomia ida depedente de'it ba osan mina rai matan ida de'it, ne'e susar tebes. Osan bele hotu iha tempu ida, nune’e ita susar. Tanba ne'e estadu tomak tenke haree no ha'u rasik hanesan Prezidente Repúblika asume ida ne'e, hamutuk ho Parlamentu Nasionál ho Governu oinsa mak ita kaer metin sustentablidade nasaun ida ne'e nia ba oin," PR Lú Olo hateten bainhira hala'o vizita traballu ba Munisípiu Baukau, Kuarta (16/12).
Aman nasaun ne’e afirma, povu Timor tenke prodús rasik ai-han ka tenke indepedente atu bele hakat ba oin.
"Se la’e mak fós hola husi rai liur, batar hola husi rai liur, modo fehuk-ropa haruka husi rai liur, ita hasai osan hola, ita nia osan halai ba rai liur, la hela ita nia rai laran," nia dehan.
PR Lú Olo dehan, programa sesta bázika agora ne'e la'ós de’it fahe hahan, maibé sinál hatudu ona katak, Governu iha komitmentu politika ida boot tebes atu bele halo iha tempu oin.
Prezidente Repúblika la’os ezekutivu, maibé halo saida mak governu hanoin atu halo, ne'ebé husu atu akompaña nafatin.
"Prezidente mai vizita munisipiu Baucau para atu koalia ho autoridade lokal sira saida mak Baucau presiza atu halo ba ita nia oan sira liu husi edukasaun, saúde, infrastrutura no kona-ba ita nia ekonomia rasik saida mak baucau bele produs atu hetan sira nia sustenta rasik. Ida nee ita tenke tuur hamutuk atu ko’alia hamutuk atu fo solusaun," PR dehan.(*)