Xefe Suku Afaça, Joaquim Fernandes Ximenes hateten, dezde uluk to’o ohin loron seidauk envolve problema konflitu.
Kuandu mosu kazu entre grupu arte-marsiál autoridade lokál sempre halo esforsu atu bele fó atensaun másimu liuhusi kooperasaun ho polisia komunitariu suku hodi rezolve.
"Ha'u simu mandatu dala rua ona. Hanesan autoridade suku durante halo kooperasaun di'ak ho ami-nia polisia komunitariu iha suku, inklui halo kooperasaun ho joven sira, liuliu ami-nia joven ne'ebé envolve iha grupu arte-marsiál," dehan Joaquim, iha sede suku Afaça, Quelicai, Baukau, Segunda (31/8).
Nia afirma, joven sira iha suku ne’e la halo problema, maibé joven sira husi suku seluk mak ba iha ne'ebá maka halo problema, maibé kestaun sira ne'e polisia no autoridade suku sira mai halo kedan atuasaun.
Nia mós husu ba parte governu atu bele kria mekanizmu ida atu bele fó kondisaun ruma ba joven sira iha suku atu bele dezenvolve sira-nia aan ba futuru ne'ebé saudavel. (*)