Ema 20 Resin iha Baukau Kuarentena iha Uma

Ospital antiga Baukau ne'ebe hamo'os ona husi autoridade hodi prepara ba fatin kuarentena karik populasaun Baukau sofre Covid-19 Ospital antiga Baukau ne'ebe hamo'os ona husi autoridade hodi prepara ba fatin kuarentena karik populasaun Baukau sofre Covid-19 Foto Especial

Tempotimor (Dili)-Timor-oan na'in 20 ne'ebé foin fila husi rai li'ur no ba liu sira-nia hela fatin iha Munisipiu Baukau daudauk ne'e kuarentena hela iha idaidak nia uma. Maibé, bainhira iha ona fasilidade iha kuarentena ne'ebé autoridade Baukau prepara, ema hirak ne'e sei evakua hotu.

Prezidente Autoridade Munisipiu Baukau, Antonio Guterres hatete, nia parte identifika estudante Timor-oan na'in 20 resin ne'ebé foin fila husi rai li'ur mak daudauk ne'e kuarentena iha sira nia uma rasik.

Durante auto-kuarentena ne'e, nia hatete, ekipa saúde munisipiu kontinua halo kontrolu.

Nia hatete, autoridade Munisipiu la hatama sira ba kuarentena ne'ebé prepara ona, tanba seidauk iha fasilidade.

Molok ne'e, autoridade sira prepara ona ospital antigu iha Tirilolo, Baukau, hodi sai fatin kuarentena.

"Bainhira ekipamentu saúde fasilita ona ba Baukau, sei evakua hotu estudante sira ne'e atu kuarentena nune'e mediku sira fasil atu kontrola i tau atensaun masimu nafatin ba sira," dehan António ba www.tempotimor.com via telemóvel, Segunda (30/03).

Prezidente Autoridade ne'e dehan, na'in 20 resin ne'ebé daudaun ne'e hala'o auto-kuarentena nu'udar estudante Timor-oan ne'ebé hala'o estudu iha Indonezia, Filipina, Potugal no Australia.

Kona-ba preparasaun pesoal saúde sira iha Munisipiu Baukau, Antonio dehan, mediku na'in 10 mak tuir ona treinamentu kona-ba atendimentu no prevensaun Covid-19.

"Mediku iha Baukau iha, treinadu ona ba atendementu i prevensaun Covid-19 hamutuk 10 pessoal, ne'ebé kompostu husi na'in 5 husi ospital rejional nian i na'in 5 seluk husi serbisu saúde Munisipal nian".

Kona-ba kuarentena, nia hatete, daudaun ne'e preparadu ona.

"Remata ona i ekipamentu hanesan kulsaun monta ona, maibé falta de'it ekipamentu seluk ne'ebé mak dadaun ne'e parte autoridade halo ona reketementu ba sentru atendementu saude nasional atu kompleta," nia informa.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com