"Ha'u husu ba hotu, atu simu vasina, liliu idozu sira,tanba idade avansadu ne'e imunidade menus ona, tanba ne'e labele fiar lia falsu (hoax) ne'ebé daudaun ne'e buras iha mídia sosiál hanesan facebook dehan ema ne'ebé simu vasina nia vida badak labele fiar ida ne'e tanba laiha Governu ida hanoin aat atu oho nia komunidade rasik", dehan Francisco Martins, bainhira halo diálogu komunitáriu iha suku Mulo, tersa (07/08).
Tanba ne'e husu ba komunidade Suku Mulo fiar ba Governu hodi simu vasina nune'e bele livre halo viajen ba mai Munisípiu.
Komunidade, Basilio Quintao, agradese ba MAPKomS nia diskursu kona-ba vasinasaun Covid-19, liuhusi diálogu komunitáriu ne'e, tanba nia rasik bele komprende saida mak vasina, tanba durante ne'e sira menus informasaun no fiar liuba lia falsu entaun tauk simu vasina.
"Maibé ho esplikasaun hosi MAPKomS ida ne'e enkoraja tebes ami nune'e ami labele fiar ba hoax no kontribui ba Estadu liuhosi partisipa vasina hodi redus númeru Covid-19 iha Timor-Leste, liliu ami-nia munisípiu", dehan nia.
Xefe Suku Mulo, Postu Administrativu Hatu-Builiku, Munisípiu Ainaro, José Florindo Andrade hatete, kona-ba partisipasaun vasina komunidade suku Mulo nia ladún ativu iha momentu lansamentu nia, tanba ho lia falsu ne'ebé espalla maka'as iha mídia sosiál halo tauk sira.
"Maibé ha'u fiar katak sira sei ativu liután iha vasinasaun Covid-19, tanba ohin sira rasik bele rona direita ona no komprnde ona saida mak vasina husi ita-nia Governu", dehan nia. (*)