Diretóra PARCIC, Junko Ito, ne'ebé hamo observasaun, kafé na'in barak iha Maubisse hetan ona koñesimentu kona-ba saida mak kualidade kafé, tanba kompara ho tinan 2002 liubà.
"Sira hatene, tanba kafé, sira maka produz, maibé sira fa'an ba ema ne'ebé ke hemu iha rai seluk, entaun konsumidór sira rai liur, konsidera kafé ida-ne'ebé kualidade, dala barak la hanesan ho sira ninia hanoin", dehan Diretora Pacific Asia Resource Centre Inter-people's Cooperation (PARCIC) iha Suku Maubisse Villa, Postu Administrativu Maubisse, munisípiu Ainaro, kinta (25/02).
Nia hatete, durante ezisténsia kooperativa Cocamau iha tinan sanulu-resin-ualu (18), iha servisu lubuk ida ona maka membru sira halo hamutuk hodi produz kafé ne'ebé ho kualidade.
"Agora daudaun iha ona, maske tuir sira nia haree ida ne'e mak kualidade ka lae, sira (membru) sira seidauk konfia, maibé konsumidór sira iha rai li'ur maka dehan, ita-boot sira-nia kafé maka di'ak, kualidade, maske folin la hanesan ho sira seluk mais, sira hakarak sosa", tenik nia.
Nia orgullu husi konsumidór estranjeiru hirak ne'e, nu'udár aktu fó konfiansa ida ba sira katak produsaun kafé husi kooperativa Cocamau, Maubisse mak kualidade di'ak.(*)