Print this page

Produsaun Kafé Menus, SEKoop Husu Kooperativa Maubisse Hadi'a Planu

By February 27, 2021 1522
Partisipante sira husi membru Kooperativa Cocamau Maubisse nian, asiste hela diskursu badak husi Sekretáriu Estadu Kooperativa (SEKoop), Elizário Ferreira iha sede kooperativa Suku Maubisse Villa, Postu administrativu Maubisse, munisipiu Ainaro, kinta (25/02) Partisipante sira husi membru Kooperativa Cocamau Maubisse nian, asiste hela diskursu badak husi Sekretáriu Estadu Kooperativa (SEKoop), Elizário Ferreira iha sede kooperativa Suku Maubisse Villa, Postu administrativu Maubisse, munisipiu Ainaro, kinta (25/02) Foto Tempo Timor

Tempotimor (Maubisse)- Kooperativa Cocamau Maubisse nu'udár kooperativa ida ne'ebé hala'o nia atividade foku liu produsaun oioin (multi-seitorial) liu-liu hanesan produtu kafé.

Kada tinan membru sira iha kooperativa Cocamau produz kafé másimu husi tonelada 100, no minímu husi tonelada 80, maibé kuantidade ne'e rasik la konsisténsia, tanba númeru sempre tun-sa'e, inklui nia kuantidade produsaun rasik seidauk barak.

Ba situasaun ne'e, Sekretáriu Estadu Kooperativa (SEKoop), Elizário Ferreira avalia no konsidera, kuantidade produsaun kafé ne'ebé produz husi membru sira, kada tinan sei menus ne'e planu mak seidauk di'ak.

Tanba ne'e, husu ba membru sira iha kooperativa Cocamau Maubisse atu hadi'a planu asaun, nune'e bele habarak liu tan nia produsaun ho rendimentu ne'ebé di'ak.

"Iha progresu hatudu katak iha membru aumentu, maibé intermus kapitál ne'e ladun iha aumenta, ne'e katak ita buka atu hadi'a matriks planu asaun nian atu bele projeta rendimentu ida di'ak, hodi fó benefísiu ba membru sira hotu ne'ebé hola parte ba iha kooperativa ne'e", dehan SEKoop, Elizário Ferreira iha armajen kooperativa, Suku Maubisse Villa, munisípiu Ainaro, kuarta (25/02).

Nia dehan, Cocamau nu'udár kooperativa multiseitorial, maibé tipu produtu ne'ebé membru sira produz, foin mak kafé de'it, tanba ne'e nia husu atu abranje mós ba atividade produtivu sira seluk ne'ebé tuir planu asaun.

"Puré-zemplu hanesan planu agora dehan atu loke kios, hakiak animal sira, entaun ida ne'e maka projeta ba oin atu bele asegura rendimentu ida di'ak hodi nune'e asegura bein-estar membru sira nian nomós benefísiu ba kooperativa ne'e", nia fó hanoin

Nune'e mós, Diretóra Pacific Asia Resource Centre Inter-people's Cooperation (PARCIC), Junko Ito hatete, bainhira ko'alia kona-ba kafé, tenke investimentu barak liu tan, hanesan hadi'a kafé laran, fasilidade hodi halo produsaun kafé ho kualidade di'ak.

"Sira ninia nesesidade, tuir loos, la'ós de'it ba kafé, maibé agora dadaun Cocamau ninia atividade sei limita ba kafé", dehan nia.

Iha parte seluk Junko Ito mós preukupa kona-ba montante osan husi rendimentu ne'ebé oras ne'e dadaun kooperativa Cocamau iha, la sufisiente tanba akomoda ona membru hamutuk 695, nune'e laiha orsamentu atu uza ba selu membru sira ne'ebé servisu.

"Entaun, orsamentu U$.35 mill ne'e la sufisiente atu responde ba membrus hotu-hotu ninia nesesidade. Maibé realidade rendimentu ne'ebé ke kooperativa bele hetan husi atividade tinan ida limita tebes ho rihun U$.35, entaun sira tenke sukat sira ninia programa bazeia ba sira ninia rendimentu", dehan nia.

Prezidente Kooperativa Cocamau Maubisse, Julio Mendonca Martins rekoñese, tuir loloos sira nia fundus hahú aumenta ona, maibé tanba kada tinan sira halo pagamentu, ka fó insentivu ba iha Xefi grupu sira ne'ebé ho valór osan mós boot no gasta kuaje osan rihun U$.12 to'o U$.13 dólares.

Nia informa, kafé nia presu kada kilograma, fa'an ho $.2.15 sentavus, $.2.30 sentavus maka ohin ko'a tiha $.0.20 cent ba iha kooperativa fó $.2.15 mak hodi tau iha kooperativa.

"Osan ne'ebé ami hetan ne'e, mai husi kafé. Kada kafé ho kilograma ida ami ko'a sentavus 20 ne'e, rai iha kooperativa no liu-husi osan sira ne'e maka sei uza fali ba sosa ekipamentus ou material kooperativa nian, nomós bele halo pagamentu nafatin ba estrutura sira, i nomós atividade sira seluk hanesan dada bee-mós, halo rehabilitasaun kafé no halo manutensaun ba kafé laran sira. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items