"Enkorajamentu ne'ebé SEKoop fó maka membru kooperativa ne'e tenke servisu, hanesan ema agrikultór tenke book-aan, atu nune'e bele kontribui ba iha dezenvolvimentu produsaun kafé no atividade produsaun sira seluk ne'e," dehan SEKoop, Elizário Ferreira ba jornalísta sira, hafoin halo abertura ba assembleia jerál Kooperativa Cocamau nian iha sede kooperativa, Suku Maibisse Villa, Postu administrativu Ainaro, kinta (25/02).

Nia esplika, objetivu dahuluk husi assembleia jerál ne'e atu halo avaliasaun ba dezempeñu servisu membru sira nian iha kooperativa laran iha kada tinan, tanba Cocamau nu'udár kooperativa multi-setoriál ida-ne'ebé eziste kleur ona no assembleia jerál rasik hala'o ona ba dala-18.

Iha daruak, nia dehan, atu define planu asaun saida maka sei halo iha tinan 2021 ida ne'e hodi bele projeta rendimentu ida pozitivu no asegura bein-estár membru kooperativa nian, sustentabilidade kooperativa, inklui mós atu asegura ekonómia no finansa kooperativa nian iha futuru.

"Terseiru, sekretária estadu nia prezensa iha fatin ida-ne'e, atu motiva mós dirijente sira, membru kooperativa sira atu bele iha vontade atu bele hala'o servisu ho di'ak asegura kualidade kafé, asegura produsaun, no asegura sustentábilidade iha futuru," Elizário haklaken.

Entretantu Diretora Pacific Asia Resource Centre Inter-people's Cooperation (PRCIC), Junko Ito, haktuir apoia ne'ebé durante sira fó ba kooperativa Cocamau, Maubisse nian mak fasilita ekipamentu atu produs kafé ho kualidade di'ak.

"Ida-ne'e hahú iha 2003 remata iha 2011. Depois ida-ne'e, durante iha tinan 9 nia laran, ami koko mós atu kapasita kafé na'in sira atu komprende kona-ba kooperativa, komprende mós kona-ba jestaun," Junko Ito ko'alia bainhira partisipa iha assembleia Kooperativa Cocamau nian iha Postu Administrativu Maubisse.

Nia hatutan, apoia seluk ne'ebé PARCIC sei oferese maka organiza membru sira atu partisipa iha atividade reabilitasaun ba kafé laran iha to'os.

Nia haktuir, bazeia ba informasaun ne'ebé nia asesu katak, durante tinan 2021, kooperativa Cocamau iha ona kapitál finanseira hamutuk rihun $64 no tuir planu katak membru sira sei aloka orsamentu maizumenus ho montante rihun $35 hodi implementa atividade iha tinan ne'e nian.

"Entaun, espera katak sira-nia atividade iha 2021 sei fó benefísiu barak liután ba membru sira," nia hakotu.

Purtantu, Prezidente Kooperativa Cocamau, Maubisse Júlio Mendonça Martins, hatutan asembleia jerál ne'e ninia objetivu ida maka atu hato'o relatóriu finansa nian kona-ba orsamentu ne'ebé kada tinan kooperativa hetan, atu hato'o fila-fali ba membru sira bele hatene.

Nia dehan, ho asembleia jerál ne'e, sira bele hato'o no aprezenta programa saida de'it maka atu bele implementa iha tinan 2021 ba leten, no ikus liu mak halo re-estrutura.

"Estrutura ne'ebé la ativu iha atividade kooperativa nian, entaun bele liuhusi asembleia jerál ne'e, ita bele halo re-estrutura ba membru sira-ne'ebé durante ne'e tuur iha estrutura," dehan nia.

Entretantu, kooperativa Cocamau eziste durante tinan 18 ona ho atividade produsaun kafé, ne'ebé oras ne'e ho membru hamutuk na'in-695, orsamentu hamutuk rihun $60-resin.(*)