Tuir portavoz Komandu Jerál PNTL Superentendente xefe Arnaldo Araújo katak, kazu konfrontu ne'e akontese iha kinta 28/01, maizumenus tuku (22:00) kalan otl, ne'ebé deskonfia involve husi membru grupu artes marsiais balu, ne'ebé komandu PNTL munisípiu Ainaro, liuhusi eskuadra Hato-Udo, konsege detein suspeitu ida ho inisial DDS (23), iha aldeia Ailoro, suku Foho Ailiku, postu administrativu Hato-Udo, munisípiu Ainaro.

"Horkalan, iha akontesimentu ida iha Ainaro ne'ebé rezulta ema ida kanek, deskonfia katak husi grupu balu, hatene ona katak grupu balu maka baku malu, ha'u la mensiona grupu a ka b, maibé iha grupu balu mak durante ne'e halo hela problema, sira asalta malu, i oras ne'e dadauk suspeitu detein hela iha sela polísia", hateten, Portavóz Komando Jerál PNTL, Arnaldo iha Kaikoli, Sesta (29/1).

Portavoz ne'e afirma, vítima husi konfrontu ne'e rasik ho inisial LZM (19) ne'ebé dadaun ne'e halo hela tratamentu saúde iha Postu Saúde Hato-Udo, tanba hetan kanek iha liman no ulun.

Entretantu kontinuasaun ba prosesu ne'e, Polísia Investigasaun Komando Munisípiu Ainaro sei halo hela prosesu investigasaun hodi bele hatene loloos motivu sira husi akontesimentu refere.(*)